《小傳日記》中澳手拖手,龍蝦煤炭再進口,煤股好難守!

　　《小傳日記》魚缸無乜方向,即係大戶都觀望緊,無乜入市意欲嘅時候,就係短線炒家嘅活躍嘅時候,今日就夠曬好睇,6分鐘內突飆350點,擊破21000大關,千幾份熊證死咗都唔知咩事,然後下晝又跌過200幾點,最低見過20358,雖然收市跌得68點,但全日波幅有成647點,牛定熊都殺過一轉!

　　孖屐眼望望,最主要都係觀望緊兩會,而呢期都憧憬緊阿爺會有再多啲撐市措施出台,其中同其他國家嘅關係都好影響經濟。不過今日外交部部長秦剛講起戰狼外交,就提到「當豺狼當道、惡狼來襲,中國的外交官必須「與狼共舞,保家衛國」,都相當之惹火。

　　不過有緊亦有鬆,邊度都辣火頭就會好不利。澳洲農業部長今日就提到,有證據顯示,澳洲嘅龍蝦出口已經恢復到以前一樣,無好似以前咁受到來自中國嘅阻礙,而牛肉同奶製品出口都開

始「復常」。記得之前神州封鎖澳洲進口,令到當時啲澳洲龍蝦全部唯有運曬落嚟,令到當時龍蝦市價大跌,百幾銀就食到一隻,不過而家進口復常,價錢都應該復常了。

　　中澳關係改善,澳洲煤炭都可以恢復進口,國產煤炭需求一定少咗,見到今個冬天都無再出現煤供應緊張情況,煤炭股首當其衝,所以之前贏開嘅煤股,11月以來反而跑輸大市。雖然隻兗礦(01171)就話舊年全年多賺八成九,不過業績係講返上年,今年keep唔keep到咁高嘅增長就真係難講,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。