《小傳日記》滙控聽日出成績,股民高呼「不可以嗇息」!

　　《小傳日記》魚缸今日算係好樣啲,先跌後回升,不過衰在成交都唔算好大,50天線係咪真係撐得住都仲要驗證!

　　不過今個禮拜就係業績期,魚缸終於要開始進入股海翻波嘅時候,好似聽日就係大細象(00005)(00011)放榜嘅大日子,放榜前就總會有啲「溫馨」故仔出街,《華爾街

日報》就回顧咗平保(02318)同滙控愛恨交纏嘅故事。平保早於2017年就第一次公布自己持有滙控股權,但係滙控一直都好驟忌持股量成8巴仙嘅平保。平保當時曾經想派人入局,不過就被時任滙控主席杜嘉祺請食檸檬,話因為好多業務喺孖屐都有重疊,平保叉隻腳入嚟會有利益衝突咁話。

　　從此平保就嬲嬲豬,呢幾年趁著滙控海外業務跌watt,孖屐一直覺得係平保喺背後推動分拆滙控,甚至近年仲有埋「分拆滙控關注組」!其實可以被平保借到位入,最主要真係因為海外業務賺唔到錢,再加埋停派季息呢壇嘢真係焫著唔少小股東,順勢令小股東覺得就係海外業務差先令到人人無季息收,所以分拆滙控嘅呼聲就大好多。

　　不過自從滙控落大閘講明唔考慮分拆之後,近期就好似少聽咗要求分拆嘅聲音。同時最大原因就係,滙控自己吹風會重新回購同派返季息,即時安撫返小股東情緒。而股價都睇到滙控已經處於無得跌嘅狀態,個個都睇好滙控要派返季息,就睇吓隻大象會唔會「講大話,甩象牙」,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。