《小傳日記》暴雪網易再傾都係要分手,玩家道具金幣賤價售!

　　《小傳日記》之前暴雪同網易(09999)驚傳分手之後,原來上個禮拜暴雪再有最後通牒,曾經再同網易傾續命,將現有基於網易2019年已經同意嘅既定條款協議,順延六個月,令到用戶可以吊多半年命,亦都令暴雪喺期間可以搵到其他「白武士」接服。

　　不過最終網易都係選擇好心分手,維持1月23號就係暴雪所有game嘅停服之日。而喺「分訊」宣布嘅呢段期間,玩家們除咗爭取時間打多兩鋪機之外都無乜好做,都係要逐步接受轉變。唔同玩家都有唔同方法應對,其中一個就係繼續打,不過就係由國服轉戰亞服,當然中國玩家出到去要有唔同玩法,都要適應。

　　有人就佛系等待復合嘅機會,雖然最後都係等唔到,不過期間都曾經傳過拼多多會係接手,算係有過希望。又有人索性全身而退唔玩,有內媒就報道已經有大量「前玩家」賣身家,將原個account或者金幣、道具放上網賤價發售,不過都係無人問津。

　　暴雪方面已經提到希望網易會妥善封存所有遊戲進度,但都要睇網易方面點做。雖然話只要暴雪搵到新嘅合作代理商,所有原有進度都有機會恢復,不過好多原玩家都唔睇好有人會接手代理,因為網易要同暴雪斬纜,原因就係暴雪要求分賬水平再多啲,而且新代理接手有可能仲要由頭申請版號,所花人力物力絕對講唔上會賺,所以真係要搵到人接服都可能只係盼望,最大機會都要暴雪考慮唔好咁大咬,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。