《小傳日記》限聚令疫苗通齊齊拜拜!嚟緊有乜好買?

　　《小傳日記》魚缸好消息真係一個接一個,除咗今朝試過重上20000點之外,下晝政府仲一次過宣布取消所有限聚令同疫苗通行證,密切接觸者都唔使隔離,剩返只係確診者要隔離同口罩令。曾經嘅新常態,去邊度都要掃安心、掃針紙,一下子全部都唔使,幸福也來得太突然吧!

　　但係隨著一連串幸福降臨,各家各戶都要準備定幾盒「幸福」看門口。繼內地出現搶藥潮,同樣放寬緊嘅香江,各種感冒藥中西成藥都有賣斷貨跡象,要嘅真係要快啲準備。

　　有意見就話,一時間放得咁傖促都係為通關做準備,內地已經開始容許出境,神州同胞目前已經唔使再掃碼,更加從來都沒有疫苗通,香江取消都係為咗佢哋而做。就咁睇都唔排除呢個可

能性,始終一直心心念念嘅「夙願」都係通關,外國旅客都唔係香江最優先嘅選項,無論保險佬、旅遊佬都非常依賴上面同胞來港消費,通關對佢哋嚟講都係最有益。

　　睇返今日魚缸表現,一度升超過500點重上兩萬,不過下晝就回落返,連取消限聚令同疫苗通都未能刺激佢炒返上去,睇嚟疫情升溫嘅憂慮都有一定程度嘅利淡喺度,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。