《小傳日記》中升業績穩定,20天線支持力強,上望50銀!

　　《小傳日記》尋日應該有好多人唔夠瞓,皆因尋晚世界盃決賽又要加時,再射埋十二碼先分出勝負。一邊有衛冕冠軍嘅法國,另一邊有參加最後一屆世界盃嘅美斯領軍嘅阿根廷,當然成為全球熱話。不過,世界盃十六強開賽前,從數據上嚟講唔太支持法國隊冧莊,因為自有世界盃以嚟,得意大利同巴西曾經連續兩屆攞冠軍,意大利係1934同1938年兩屆,巴西就係1958同1962年。數據就係數據,以機會率去睇,法國贏出機會低過阿根廷,結果連運都去晒阿根廷嗰邊!

　　其實投資都係一樣,好多投資者先入為主,唔相信客觀事實,見隻股票急升就追,完全忽視基本面,強者恒強、弱者恒弱係有原因嘅,短炒又係另一回事,但要做到快、狠、準,止蝕唔手軟,最重要係夠膽贏,否則,俾你捉到隻等待爆升嘅股票都唔會賺得多。

　　技術走勢上,中升本月初升到45.5銀後回落整固,近日幾次試穿20天線(約39.66銀)都企番上去,今日升穿上日高位,如果維持11月以嚟嘅上升形態,股價可見50.55銀先至再回調,可以收穿38.6銀作止蝕吼位買,先望45.5銀先,企穩再望50銀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。