《小傳日記》LABUBU魅力沒法擋,拍賣拍出108萬天價!

　　《小傳日記》最近,泡泡瑪特(09992-HK)真係風頭一時無兩,無論係股價定係消息面都係日日有新料,真係妥妥嘅「頂流」!泡泡瑪特股價連番飆升,更將創始人王寧送上河南首富嘅寶座,超越豬王牧原股份大老闆秦英林,認真係新消費打贏舊消費!

　　尋日,泡泡瑪特又搞咗一單大新聞,全球唯一嘅初代薄荷色LABUBU喺永樂春拍上以108萬人仔嘅價錢成功成交,呢隻LABUBU高131cm,用PVC做嘅,仲係全天下獨

一份嘅薄荷色,當屬潮玩界嘅「天花板」。除咗呢隻薄荷色LABUBU,喺同場拍賣會上,仲有一隻全球限量15隻嘅啡色LABUBU以82萬人仔成交,呢啲數字真係聽落嚇人,不過拍賣呢D嘢好多潛規則同內部玩法,大家聽完當趣聞就得。

　　講起泡泡瑪特有幾Hit,就連神州嘅銀行都要搭順風車。最近平安銀行喺全國多地推出咗一個吸引新客嘅活動,只要係純新客戶,開戶之後存超過5萬人仔定期3至6個月,就可以獲得泡泡瑪特嘅LABUBU盲盒,而如果辦埋信用卡,就有機會攞最新3.0版嘅盲盒!銀行話啲盲盒係正規渠道買返嚟嘅,保證係正品。不過,幾年前河南村鎮銀行瘋狂攬儲導致爆雷,前車之鑑,就算官方無意見同行都有意見啦,因此有部分地區嘅監管部門已經發通知,禁止銀行用送禮品嘅形式嚟拉存款。

　　到最後,小傳想同大家分享,原來唔係所有LABUBU系列公仔都叫LABUBU!例如LABUBU家族嘅族長,即係啡色嗰隻原來叫ZIMOMO,至於粉紅色頭上有朵花嘅就叫MAKOKO,大家如果要炒LABUBU,記得先做好功課,以免發生將Chiikawa叫成「卡哇痴」嘅慘劇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。