《小傳日記》滬上阿姨首掛係威係勢,有無可能成為第二個雪王?

　　《小傳日記》今日滬上阿姨(02589-HK)掛牌,早盤飆咗成七成幾,最高見到196.8蚊一股,市值直接衝到206.33億。之前申購已經好誇張,申購倍數3400倍,茶飲股中僅次於蜜雪冰城(02097-HK)5200倍認購。咁多人追,好多人諗緊會唔會成為第二個「雪王」蜜雪冰城?

　　但講真,睇返佢哋嘅基本面,滬上阿姨同蜜雪真係有啲距離。滬上阿姨2024年收入32.85億人仔,同比跌咗1.9%,股東應佔溢利跌咗15.2%。平均單店GMV都由

2023年嘅155.9萬人仔跌到137萬人仔。反觀蜜雪冰城,2024年收入242.1億人仔,同比升咗21.7%,淨利潤更加急漲39.8%。一個係跌緊,一個係升緊,呢個差距真係一目了然。

　　再睇佢哋嘅盈利模式,滬上阿姨成96.5%收入係靠加盟商,賣物料、設備同埋提供加盟服務。雖然盈利模式同蜜雪冰城類似,但問題係滬上阿姨嘅規模同增速完全比唔上人哋。蜜雪冰城2024年賣貨品設備收入242.1億人仔,同比增長21.7%;加盟服務6.2億人仔,同比增長52.8%。但滬上阿姨呢?2024年賣食材原材料先同比增長1.27%,賣設備仲暴跌45.86%,加盟服務亦跌近3%,完全冇得比。

　　並且滬上阿姨呢种盈利模式非常依賴開店速度。但問題係,茶飲行業而家明顯放緩,2025年年頭全國茶飲門店總數少咗3萬間。滬上阿姨加盟商閉店率達8.7%,高過行業平均水平,開店速度慢仲要面對閉店壓力,滬上阿姨真係頭頭碰著黑。

　　再睇品牌定位,滬上阿姨一路都係搵緊方向。佢2013年係靠五穀茶起家,用血糯米、青稞、燕麥同奶茶做出嚟嘅特色飲品,當時喺北方好受歡迎,但南方就唔係咁啱,因為五穀茶飲熱飲比較多,南方地方天氣熱,熱飲唔吸引。到2019年,佢又跟隨風推出水果茶,2020年改品牌口號為「愛鮮果茶,喝滬上阿姨」,希望轉型搶市場,但茶飲邊個賽道都係逼滿競爭對手。

　　呢幾年滬上阿姨又搞咗咖啡品牌「滬咖」,又推咗平價模式「輕享版」去搶下沉市場,但暫時都未見火候。滬上阿姨策略又改嚟改去,喺消費者心目中冇形成清晰嘅品牌印象。

　　所以,如果你問滬上阿姨會唔會成為下一個雪王?老實講,機會真係唔大。滬上阿姨喺營收、增長速度同品牌心智上,都比唔上蜜雪冰城。可能滬上阿姨未來仲有機會轉型成功,但短期內,佢要追上雪王,講吓笑就好啦。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。