《小傳日記》《黑神話》現象級成功!個個都撐都係多得中國風?

　　《小傳日記》呢兩日魚缸呢邊無乜反應,但A場嗰邊都集中捧「黑神話概念股」,由間接持股,到出版設定集都有得升。但可惜魚缸呢邊都只係得隻QQ(00700-HK)叫做係製作公司遊戲科學班底嘅前僱主,而家都已經無關係,所以魚缸呢邊完全炒唔起,可惜可惜。

　　今次呢隻game都可以算係空前絕後,《黑神話:悟空》是神州自主研發嘅第一隻3A遊戲,發布前都引起現象級嘅熱度。《黑神話》發布後最高峰試過222萬人同時喺Steam在線打機,創下史上第二同時最多人在線紀錄。而《黑神話》嘅登場喺神州遊戲界更加係歷史性創舉,有唔少遊戲公司直頭批多日假畀公司員工專心試玩《黑神話》,甚至game都送埋當福利。

　　雖然話係史詩級巨作,但《黑神話》線上版最平268銀人仔就可以玩到,定價一啲都唔算貴。就算係咁,據孖屐估計《黑神話》成本可能高達約7億至11億人仔,但上線當日就已經賣出450萬份,就算用最平嘅268銀計,一日就已經回本兼有賺。

　　新出兩日多啲,就已經有大量遊戲側錄流出,就算唔玩都好容易可以觀摩到呢款爆紅巨作。

老實講,叫得做3A遊戲,當然而就係用咗「a　lot　of」金錢、資源同時間打造,所以聲畫方面都無得輸。尤其一開始無耐就已經有大場面出現,呢一段喺聲效、分鏡等等方面都堪比電影級數,3D畫面移動速度流暢,打鬥聲效都立體環迴,人物動作都好細緻流暢,唔識打機都好似睇緊一套高質素嘅動畫電影咁。

　　《黑神話》大熱,上面提到嘅「質素」方面當然係最重要一環,而有更多玩家嘅評論都提到,中國風更加係支持嘅重點原因。《黑神話》以孫悟空作為主要角色,同佢相關嘅《西遊記》角色應該都會慢慢登場。據講為咗研究打機,已經有外國玩家開始咪緊《西遊記》,被視為將中國經典向外輸出嘅大力幫助。另外,《黑神話》大量以實境取景,主要取景山西嘅旅遊部門都已經搭上「黑神話概念」邀請「本命人」嚟旅遊。

　　目前普遍意見評論都係非常正面,連外交部被問起嘅時候都贊同係反映中華文化嘅吸引力。

今次嘅成功,未來神州大有機會陸陸續續會出現更多3A遊戲,不過打前提都係要有更多政策支持,遊戲產業期待版號發放可以鬆手啲、防沉迷機制可以放寬啲,咁先可以締造更多「神話」,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。