《小傳日記》比亞迪保險放榜!車企新賽道個個都想闖?

　　《小傳日記》今年以來車股經常都被詬病面對價格競爭,就連Tesla都被減價戰影響毛利表現,魚缸一眾中資車股更加屢被睇淡。只有王者BYD(01211-HK)比較站得住腳,始終乜都行先過人,連車企搞保險都一馬當先。

　　前身為易安財險嘅比亞迪保險,今年先啱啱獲金監總局批准銷售保險,最新就公布咗第二季同半年嘅營運表現,算係正式開業以來嘅第一份成績表。今年上半年保險業務收入6726.23萬銀(人仔.下同),淨利潤1846.2萬銀;期內車險簽單保費6739.39萬銀,平均每架車保費大約4900銀,比起神州上年平均每架車4000銀要高。

　　就喺減價戰開打前一年,車企競爭開始由檯底打到上檯面,當時經常都有唔同車企嘅黑材料日日被揭,又著火又入水咁,雖然唔肯定係咪真係由對手發布,不過揭得出嚟都一定發生咗先會有圖有片,間接表明電動車出現意外機會都唔低。與其出事先被車主要求賠償,不如出事前就叫車主幫襯自己買保險,咁起碼要賠都慳咁部分。

　　而客觀嚟講,電動車構造同燃油車大大唔同,涉及更加多精密部件,價值估算同以前燃油車一定有所唔同,與其要求保險公司重新估價,車企自己做電動車嘅估價的確會方便得多。

　　電動車企賣保險其實都算係一種垂直整合,將供應鏈由生產鏈延伸至售後。BYD嘅供應鏈一向都比同行完善,電池廠再到生產,而家再向後延伸做埋保險,擴闊電動產業鏈版圖,開拓商機,令其他行家好似小鵬(09868-HK)、蔚來(09866-HK)之類都研究緊入局車險市場,可以預見到呢個就會係下一個競爭舞台,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。