《小傳日記》許家印「赴京」請罪?恒大財富停運即斷水?

　　《小傳日記》恒大(03333)危機愈捲愈大,繼噚日傳出許家印被監視兼限制行動之後,恒大系尾盤急跌,到今朝仲全系停牌,原因至今都尚未公布。到今日更多細節曝光,原來許家印唔只係被監視,仲連人影都唔見。

　　噚日《彭博》引述消息人士話,許家印今個月已經被警方帶到指定地方監視居住,而內媒《觀察者網》都接近到恒大方面知情人士,話事發就喺幾日前,而許家印而家正係身處北京受到監視,並被「限制部分行動自由」。

　　到今朝就忽然間全系停牌,計返恒大物業(06666)係8月3號復牌,恒大汽車(00708)係7月28復牌,兩隻股復牌只係兩個月就再次停牌,而恒大8月28先復牌,計到今日先啱啱好一個月。

　　內媒《華夏時報》最新再引述到相關人士報道話,近期兩次例會都唔見許家印現身,其中一次許家印無露面,另一次本應由許家印主持嘅例會,但佢就並無出現。據講許老闆對上一次出現喺人前已經係9月13號,當時仲喺群組都柯打要求各地督促解決專案限售問題。

　　如果係咁,時間上都算脗合,恒大自今個月中開始出問題,大約17號,有傳媒報道恒大旗下恒大財富已經有多人被深圳巿公安拘留,包括恒大財富的法定代表人、總經理杜亮。報道提到恒大財富涉嫌違法歸集資金形成內部資金池,違反合同約定錯配產品投向、期限,造成廣大投資者損失,即係非法集資。

　　如果許家印都係差唔多時間開始無露面,可能都係同呢件事有關,換言之,許家印目前嘅遭遇可能同杜亮一樣。恒大出事以來集資都變得極之困難,如果不惜一切都要籌到錢,可能期間會出現多咗好多「方法」都唔頂,而自月中以來,恒大有好多隻債都已經還唔到息,可能恒大財富就係恒大嘅一大資金來源,一停就斷水。而目前都好難講許家印幾時先出現返,而幾時復牌又係一個謎,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。