《小傳日記》借殼唔成就搵人收購!威馬獲開心汽車接收?

　　《小傳日記》Apollo出行(00860)宣布原定以20.23億美金,即係大約158億港紙,全購威馬汽車。威馬方面原本以今次全購來借殼上市,不過上個禮拜五(8號)黑雨停市期間,雙方就各自宣布已經終止收購。不過時隔幾日,二手車平台開心汽車(KXIN.US)就宣布計劃全購威馬汽車!

　　上個禮拜五,Apollo同威馬各自宣布終止收購。Apollo方面就話,係考慮到全球市況動盪及地緣政治衝突等等嘅「商業因素」,買賣雙方相互同意訂立終止契據以及終止收購

協議。而威馬就喺微博到公布,自願終止與Apollo在港的RTO(反向收購上市)進程,不過都仍然係Apollo嘅重要股東,未來會繼續支持Apollo嘅發展。

　　威馬連埋最後呢一次,總共三次挑戰上市,不過都係屢戰屢敗。第一次2020年計劃搶先同行喺科創板上市,不過就過唔到監管審核而失敗;第二次轉戰香江,不過都係不了了知。最後今次改為借殼上市,最終都係過唔到關。

　　不過就係隔咗幾日,今日開心汽車就宣布已經同威馬簽署非約束性併購意向書,計劃增發一新股來全購威馬。而星期日(10號),威馬創辦人沈暉就喺微博放風話,出差去咗慕尼黑同紐約,「好事多磨,靜待花開」,然後朵花今日就好「開心」咁開咗。

　　雖然威馬成功泊入開心汽車碼頭,不過,威馬本身都唔係咩「好嘢」。2022年起,威馬嘅不利消息一單又一單,新車研發唔到、賒數令到供應商暫停供應核心零部件、停產以至經銷店閂門,被執行總金額超5.9億銀人仔,種種跡象都顯示已經頻臨爆煲,今次開心汽車收購已經接近係白武士出手。

　　不過睇返喺納斯達克上市嘅開心汽車,上個星期四(7號)忽然暴升九成,之後一日(8號)又急跌返兩成半,唔知係咪同今次可能收購有關。不過威馬咁嘅背景,如果真係收購成真,對開心汽車來講都唔知係咪好事,畢竟而家新能源車嘅競爭都已經唔係早兩年嘅程度,而家入場真係好雞肋,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。