《小傳日記》美圖半年蝕轉賺,竟然係多得呢一瓣?

　　《小傳日記》高盛最新就出咗份研究報告,唱好神州咁多間AI公司入面,百度(09888)一定係首選。高盛就話,百度係最大機會可以藉生成式AI長期賺錢嘅公司,因為百度嘅AI不斷成長,而四層生成式AI亦都為百度提供好強嘅基礎,預計盈利將可以繼續保持上升。

　　而身為AI股裏面嘅「黑馬」,美圖(01357)就啱啱出咗盈喜。其實美圖由上年年底已經開始炒起,當時因為佢啱啱出咗由真人相變成AI畫嘅人像繪圖,於是就由5毫子炒到今年3月去到3蚊,先至回落返啲。到上個月又推出自家AI大模型「Miracle　Vision」,於是就再由2蚊以下炒到上3.5銀。

　　正當孖屐期待緊美圖嘅AI可以搵到錢,美圖啱啱出份盈喜,雖然係轉虧為盈,不過主要賺錢原因居然唔係AI,而係炒幣。美圖就話,預期扭虧為盈嘅主要原因,係因為已購買嘅加密貨幣嘅市場價格高過上年12月31日嘅市場價格,故減值虧損撥回約1.85億人仔。簡單來講就係因為揸住嘅crypto升咗先有錢賺,而且美圖仲話,並無計劃購買或出售任何crypto,即係今次所賺嘅錢都唔係袋袋平安。

　　之前百度文心一言嘅圖像生成作品令人失望,因為只係用咗外國嘅開源AI來生成,都唔算係自行生成。而美圖深耕影像咁多年,大家都期待美圖可以成為圖像AI生成嘅代表,點知今次盈喜都未實際講到AI到底有幾賺錢,仲只係靠炒幣賺到,難免都令人有啲失望。所以今日雖然最多炒高升過13巴仙,不過臨收市前已經縮到得返唔夠3巴仙,6月至今已經3次挑戰3.5銀阻力失敗,睇來要等AI賺到錢都仲有距離,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。