《小傳日記》雲巴係啟德嘅未來?繁忙時間夠唔夠載?

　　《小傳日記》聯儲局就快公布議息結果,加四分之一厘基本都係定局,不過最擔心就係鮑叔開完會之後嘅幾句,呢幾句先係全地球關注緊嘅未來意向。就係因為呢幾句,今日魚缸觀望之餘加埋無北水,全日成交只係得600幾億,悶到抽筋!

　　觀望還觀望,香江呢邊都仲觀望緊政府會唔會批到「雲巴」駛到落嚟。雲巴係BYD(01211)自行研發,據BYD介紹,雲巴轉彎半徑小、爬坡能力強、噪音低、振動小、安

全性高等等好處,仲要係全自動運行系統,無人駕駛;電池方面就係用BYD自家磷酸鐵鋰系統。

　　第一套雲巴系統就落戶重慶璧山區,嗰區係屬於重慶嘅西部科學城,2021年4月已經正式開通,開朝7晚10,車費只係2至4銀人仔,連接璧山地鐵站至成渝高鐵站。至於第二套雲巴就係超哥之前去參觀嗰條,位於深圳坪山區,連接坪山高鐵站至比亞迪總部園區入面嘅比亞迪北站,全長8.7公里,朝6晚11,車費2至6銀人仔,新鮮滾熱辣上年12月底先開幕。

　　如果雲巴真係落到嚟香江,低噪音效果的確非常貼合東九龍啟德區嘅發展。不過其中一點係雲巴載客量唔高,當啟德區發展成熟之後,每當繁忙時間,雲巴又足唔足以承受全個啟德嘅打工仔搭出去轉港鐵呢?都仲要度。據講政府其中一個考量就係,雲巴載客量唔高,同時每節只有一道車門,上落都唔係最方便,所以都仲研究緊可能性,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。