《小傳日記》新能源車補貼退場,敢加價先算強?

　　《小傳日記》魚缸新年開始咗一個禮拜都唔夠,就已經升咗成1200點有多,果然有通關憧憬喺度氣勢都唔同啲。

　　新一年除咗魚缸轉勢,神州嗰邊對新能源車嘅補貼政策都完咗。由於原本補貼係直接畀車企嘅,無咗補貼之後每架車就會賺少咗。所以新年開始好多間新能源車公司都要加價,有車主就寧願早買早享受,費事遲買貴幾嚿,更何況一貴就唔只係幾嚿而係幾千至過萬銀不等。好似BYD(01211)就由1月1號開始,旗下王朝、海洋同騰勢等等系列嘅官方指導價都會加,幅度大約係2000至6000銀人仔不等,而1月1號前簽到約都唔計算在內。

　　不過都有公司選擇自己硬食而唔加價,好似小鵬(09868)就宣布全個2023年旗下車型嘅全國建議零售價將會保持同2022年底綜合補貼後嘅售價一致,除咗講明無因為補貼結束而加價,更加預告埋全年都唔會加價。

　　補貼結束之後,加價或者唔加價都可以係車公司嘅選項,但係面對供應鏈問顯嘅成本上漲,加價絕對係解燃眉之急嘅一個方法,BYD加價聲明都提到,除咗因為補貼完結,全球原材料價格大幅上漲都係主因。

　　不過其實加定唔加都唔係車公司完全可以自主。全部車公司都應該係面對同一個成本上漲嘅問題,而家小鵬唔加價,變相其實係硬食曬其他公司要加價嘅原因。不過,之前小鵬業績比起BYD嚟講都係差啲,喺孖屐嘅bargaining　power都無咁大,隨便加價可能會令準買家轉揸另一架車,要好似BYD咁已經有領先優勢先可以話加就加。

　　所以加唔加價都係唔同策略,但係揀加價嘅都係有條件先可以加到價,個個都想加價,唔通個都加到咩?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。