《小傳日記》內房股趁好市不停套現,有錢其實唔怕買

　　《小傳日記》呢期大家見到內房股好小小,就不停賣貨套現,齋碧桂園(02007)系列都已經配售過幾次,呢次就到碧桂園服務(06098)套現55億,早前其他同業一同效法,總之個市仲有幾多水滴,都唔客氣咄埋佢就係啦。

　　其實內房不摟都係缺水,之前阿爺叫做釋放些少流動性解渴,今次集體一齊出嚟搵水,除左阿爺允許之外,起碼叫做保住員工生計,畢竟起樓賣樓樣樣都係計錢,而家內地都唔玩「清零」,套現動作好大機會係為下年銷售做準備,一過完年就開展強勁攻勢,結婚嘅結婚,生仔嘅生仔,買樓嘅梗係繼續買樓。

　　內地房地產係咪剛需我真係唔敢講,畢竟人口開始老化,年輕一輩係咪咁踴躍買樓都唔可以寫擔保,不過內房股超跌就肯定係真,其實拉長去計,買幾隻大型龍頭內房,點計都係會升,問題係你呢一次夠唔夠「膽」買同夠唔夠「錢」買,碧桂園最差試過見一蚊,敢買都升一倍啦。

　　今日恒指受美國消息影響,因為PPI數據大失所望,市場憂慮CPI都唔太樂觀,聯儲局加息都可能更加狠手,不過市場普遍預計呢次都係加半厘,消息消化後,大家都開始認真思考,減慢加息唔代表要減息,甚至有機會整個加息周期都拉長。所以連埋今日一共六個交易日計,恒指都唔太衝得上二萬點關口。

　　大市嘅嘢不升則跌,如果連續六日都升唔到上去,大家可能要好好調整策略啦,因為分分鐘下行車又預備開動啦!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。