《小傳日記》陽光能源擬派特別息，現價小注博入或有驚喜

　　《小傳日記》近日內地再推支持房地產業政策措施，沉寂多時嘅內房股自然有運行，我發現一個唔知算唔算係規律，就係碧桂園（02007）同碧服（06098）經常一日龍頭，一日榜尾，好似尋日呢兩隻內房就位於藍籌升幅榜前列，但今朝十點半鐘過後，碧桂園同碧服就包辦咗由尾數起頭兩位！不過，照咁推，今日就應該趁低買碧桂園同碧服，等佢兩隻聽日上返榜首就食胡，好過你買大陸樓啦！

　　不過，今日想講吓隻陽光能源（00757），集團主要從事買賣同製造太陽能多晶硅、單晶硅錠╱硅片，以及提供加工服務，同時生產、買賣光伏電池及組件、製造，仲有買賣太陽能單晶硅電池，以及興建及經營光伏電站。

　　集團截至今年6月底止，半年營業額按年增加11.6%至近31.5億人仔，股東應佔溢利按年升10.4%至6.77億人仔。上周一（21日），集團發通告話出售全資附屬公司曲

靖陽光45%股權，總代價13.5億人仔，買家係陽光能源執行董事、主席及主要股東譚文華及╱或執行董事兼行政總裁譚鑫控制實體及獨立第三方中國聯塑（02128），集團同時建議派發每股7港仙特別股息。

　　集團指，出售後剩餘從事光伏組件製造及買賣；光伏發電系統的興建及運營；及半導體業務，兩者有明確嘅業務劃分，而出售所得用於剩餘業務擴展和償還銀行貸款等。有關建議需待股東批准。

　　翻查資料，陽光能源喺2013同2012年分別宣布過5供1同9供1，但見佢2021年中期、末期同今年中期都恢復返盈利，加上又派特別股息，供股風險低咗。10月28號公布相關消息，當日股價收報0.239銀，加埋7仙應該值0.309銀，股價11月4日上過0.3銀，以今朝0.265銀計，息率有26%，可以小注博吓，但風險唔應該大過回報，所以低過買入價最多7仙就止蝕。當然，如果集團確認會派息，股價抽高的話亦可以先行食胡。請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。