《小傳日記》六大賭場全部過骨，大馬雲頂輸乜？

　　《小傳日記》今日魚缸都幾得人驚，魚缸今朝最多試過嚇跌700幾點，不過穿完50天線之後就慢慢升返上嚟，最終全日只係跌200幾點。

　　今朝大部分藍戰士仆直嗰陣，濠賭股反而就逆市向上，因為終於有驚無險，馬交政府公布賭牌爭櫈仔結果，原有6間賭場算係成功續牌，獲發博彩經營批給臨時判給，而過江龍大馬雲頂集團旗下ＧＭＭ就踢館失敗。

　　其實孖屐普遍都預期係原有嗰6間繼續坐穩，因為呢廿年嚟6間賭場都投入咗唔少真金白銀，加上有唔少馬交市民都係做荷官或者賭場相關工作，萬一是旦一間賭場真係無咗個牌，忽然間就會有一批人打爛飯碗，係會出現幾大問題。雖然馬交政府無解釋點解雲頂會輸，不過之前都已經講咗，未來呢10年都唔會再批博彩用地，變相搞賭場就只可以用原有嘅設施，新公司要入場都已經無地可以用。

　　另外，馬交政府都有公布依評分排名嘅批出「臨時判給」名單，排名就係美高梅（02282）、銀娛（00027）、金沙（01928）旗下威尼斯人、新濠（00200）、永利（01128）同澳博（00880）旗下澳娛綜合。同預期一樣澳博係最危險嘅一間，而今日升得最勁嘅就係尾二嘅永利，升成一成半。之前都有提到澳博係華資，相對排包尾都會安全，但係永利係外資，所以尾二入圍可能就較為驚喜，亦都可能係升得特別多嘅原因。

　　雖然賭牌風雲叫苦連天有驚無險，不過神州疫情反覆，防疫政策未知幾時會有轉向，賭場業績隨時第四季都仲未返到身，追賭股都唔係無風險，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。