《小傳日記》股神榮休!巴菲特最錯交易學懂了甚麼?

　　《小傳日記》芒格過身後一年半,即將95歲嘅「股神」巴菲特都喺巴郡最新一次業績會上,重磅宣布做到今年底就會退休。股神掌舵巴郡超過一甲子,股價暴升5.5萬倍,成為地球上最貴股票,更加係「股王之王」。

　　雖然巴郡榮膺地球最貴股票,但眾所周知,巴菲特一直都認為買起巴郡係咁多年來最錯嘅決定。喺2010年,巴菲特就同大家講過巴郡係佢「買過最蠢的股票」(the　dumbest　stock　I　ever　bought)。當年股神已經奉信價值投資,以低價買入有執笠危機嘅公司,以工廠執笠得來嘅資金回購公司股份嚟大賺一筆。巴菲特因為低價而吼中巴郡,坦誠係無視已經開始式微嘅紡織業風險,買入巴郡之後結果都係要關閉工廠,原本諗著認衰止蝕,開價每股11.5美元接受回購,但竟然被工廠原老闆Seabury　Stanton壓價,提出每股11.375美元。結果股神一氣之下索性買起巴郡,再炒咗恰佢嘅Seabury　Stanton。最終下咗啖氣,但就變成式微紡織廠嘅老闆。

　　始亂,但最終並無放棄。巴菲特之後幾年以巴郡之名涉足保險業務,為巴郡日後嘅投資提供主要資金來源,隨著投資業務廣泛並成長,巴郡嘅「式微紡織業務」最終喺1985年關門大吉,但呢個時候嘅巴郡亦唔使再靠紡織維生,華麗轉身成為世界數一數二嘅投資企業,更莫講話成為地球嘅股王之王。

　　股神因為獨到眼光而為世人追捧,當然有可能同出身有關,爸爸做過broker,8歲就已經出入紐交所,11歲開始炒股,根正苗紅嘅商業奇才,但往往有錯先令人成長,就如同買錯巴郡之後,更一錯再錯意氣用事買起巴郡,巴菲特最終亦無得唔真正接掌巴郡業務。而喺過去60年來,股神一直將呢個「錯誤」,扭轉成為世界級投資企業,更令自己得到「股神」之稱,呢段旅程家底算係根基,但承認錯誤嘅勇氣、修正錯誤嘅魄力,先係股神同巴郡行到今時今日嘅信念。銘記教訓再堅持到底改正,到名成利就之時,當初嘅「錯誤」,世人都只會一笑置之,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。