《小傳日記》AI做旅遊攻略掂唔掂?飛豬「問一問」五一後見真章

　　《小傳日記》尋日放完一日五一假期,今日上完班,又放三日假,唔少朋友都計劃出遊。出遊梗係開心喇,但出遊前做攻略就十分頭痛喇。魚缸炒AI百炒不厭,有朋友一於將做攻略嘅重擔交畀AI。

　　近期一個旅遊AI喺神州大爆,繼AI產品Manus嘅邀請碼被炒到逾萬蚊後,呢個旅遊AI嘅邀請碼都一碼難求,炒到上千蚊。飛豬旅遊AI助手「問一問」發布後迎來爆火,由於AI助手僅開放畀飛豬F5及以上嘅會員,其他用家就需要通過該級別嘅會員分享邀請碼先可以使用,由此催生炒賣。

　　其實「AI+旅遊」已經係一個屢見不鮮嘅產品,攜程(09961-HK)喺2023年7月就推出過旅遊AI　APP「攜程問道」、同程(00780-HK)喺今年3月又基於DeepSeek,推出「程心AI-DeepTrip」。喺海外都有好多熱門嘅AI旅遊APP,例如Mindtrip至今已完成2000萬美金融資,Layla獲得Booking.com等330萬美金嘅天使輪投資。

　　咁今次嘅飛豬問一問係真係咁好用,定係炒作呢?睇返用家試用問一問嘅截圖,點入問一問,就會有四個入口,分別係「為我發現目的地」、「為我找便宜機票」、「為我規劃行程」、「為我找特色酒店」,下方仲有一個對話框,可以直接同AI對話。

　　你同AI講,「幫我規劃一個五一黃金周去日本嘅五日行程,要揾啲影相好睇嘅地方,想去體驗衝浪,預算兩萬蚊」,然後問一問就會生成五日行程,包括來回嘅機票,酒店,玩嘅地點,體驗活動,推介理由。份行程睇落後都幾清晰,有時間點,景點之間嘅通勤時間同方式,每個景點嘅逗留時間。唔知照佢規劃嘅行程玩work唔work,但睇落安排得既充實又方便。

　　問一問嘅機票同酒店都接入咗自己嘅旅遊APP,AI可以根據實時變動嘅價格幫你安排合乎預算嘅行程,仲可以喺問一問入邊撳入去落訂。

　　但都有人發現問一問嘅問題,例如,景點規劃有啲過於注重形式,明明位於酒店附近,就有唔錯嘅景點,自己規劃嘅時候可能就會諗住不如順路行過去望下,再去其他景點。但問一問就會直接推薦啲出名嘅景點畀你。都有人埋怨,問一問推介嘅景點漏咗假期特別安排嘅匯演。

　　問一問出世之前,有人埋怨佢啲AI前輩們推介嘅景點交通唔順路,景點分散路途奔波,按照AI規劃嘅時間去到結果景點關咗門。目前第一批試用飛豬問一問嘅朋友仲喺旅途中,五一長假期後就可以聽一聽佢哋點評價。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。