《小傳日記》出口禁令再加罰款,英偉達豪擲五千億美金凍過水?

　　《小傳日記》侵侵無限反轉嘅操作真係無得頂,今次又輪到英偉達中槍。4月9號嗰陣,黃仁勛花費一百萬美金參加侵侵嘅海湖莊園私人聚會,以英偉達承諾未來四年喺花旗國使5000億美金起AI超算中心獲得暫停H20禁令。點知轉個頭就反口,上個禮拜二(4月16號),英偉達份文件出街,話美國政府要佢哋出口H20芯片去中國,以後要申請「冇限期」許可證。

即係話,由4月14號開始,英偉達要計提成55億美金(約430億港紙)嘅損失,包括庫存、訂單同埋其他開支。搞到英偉達股價盤後一度跌6.52%,市值蒸發咗逾千億美金。

　　H20芯片本來係英偉達專登為神州市場設計嘅「特供版」,算力得H100嘅1╱15,但係中國科技巨頭(字節跳動、阿里(09988-HK)、騰訊(00700-HK))今年第一季已經向英偉達訂購咗至少160億美金嘅H20晶片。而家突然要申請許可證,分分鐘拖到天荒地老,仲點出貨?

　　最慘嘅係,交咗五千億「保命費」嘅,唔止英偉達一家。好似「星際之門」計劃,一開始投資1000億美元,未來四年仲計劃追加到5000億美元,主要係建AI數據中心同基礎設施

。蘋果公司都承諾未來四年喺美國投資超過5000億,包括喺德州搞AI伺服器工廠,亞利桑那州生產晶片。依家英偉達畀人咁玩,其他公司點會唔驚自己會唔會都成下個「英偉達」。

　　不過即使冇特朗普呢版禁令,英偉達其實都好難向中國出口。拜登政府由2022年開始已經著手限制AI晶片出口,2023年仲進一步收緊政策,唔想高性能AI處理器流向海外。而即將喺5月15號生效嘅「AI擴散規則」,就係直接針對H20。呢條新規定話,H20即使係專為中國市場設計,未來出口中國或者其他部分國家,都要事先攞到美國嘅出口許可證先得。

　　所以話,老黃當初以為自己喺特朗普面前交嘅五千億係VIP通行證,就會無事無幹,只係估唔到特朗普突然反轉豬肚。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。