《小傳日記》不回不回還須回,回又唔一定攰,踎得低先彈得高!

　　《小傳日記》升咗咁耐魚缸終於真係回調,上到24000後利淡突襲,造就今日呢個高位急回800點嘅局面。

　　整理返過去兩日恒指去到高位24000明顯有阻力,噚日大成交畫十字星就更加有回吐味,果不其然市場就會獻出回落嘅原因,先有史詩級股王英偉達嘅平淡財報,引發AI股晶片股見頂嘅憂慮,再有牙侵精準宣布再加收多10%關稅,技術面消息面配合,砌好條滑梯就可以一吓瀡落去。

　　累計恒指低位升上24076已經升咗超過5400點,亦已經偏離10天線好耐,近期開始掂返10天線,就證明升勢係差唔多。近期孖屐中人都一直提緊即將開始要回吐,並唔係唱淡,所謂「休息是為走更遠的路」,有得回先有得升,有上有落先係健康嘅升勢,消化咁一啲食胡壓力,然後先搵機會再升。

　　時間上臨近兩會,特朗普呢個時候宣布加關稅又係有攞景味,但上面都提到孖屐等咗呢個回調都好一段時間,低位買上嚟嘅,今日正路都算輸好多。而臨近兩會個市炒到咁高,為免開會成為跌市藉口,如果兩會前有原因令大市先行回調,對於兩會舉行期間都可以帶來更多穩定性,避免「高處不勝寒」以至「不及預期」等等嘅出現。自特朗普同國家主席習近平通話,孖屐就有期望中美雙方喺呢四年入面可以有更好嘅「溝通」,如果呢個「溝通」繼續行之有效,咁今次加關稅都算嚟得著時。

,實際上好難再有以前嘅高增長,今次回落,都算係早有預期嘅情型,純粹都係孖屐趁勢斬獲嘅理由啫。而中線嚟睇,AI當然都係中國以至全世界嘅主旋律,總會有題材,如今趁勢回落,反而未嘗唔係加倉嘅好時機。

　　大市高低位已定,近期都開始用緊黃金回調比例數位,第一個位就係0.382倍嘅22000,市底強唔強就睇22000守成點囉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。