《小傳日記》金多寶中1.9億你點部署,買幣買股定買兩房單位?

　　《小傳日記》今年新春金多寶搞珠一注獨中1.93億,夠買6000手「大笨象」滙豐(00005-HK),又或者掃6905兩黃金,變身「金舖老闆」!咁大筆橫財,單靠揸現金都夠好好過日子,但人一定就係貪心㗎啦,唔想巨款被通脹侵蝕,就要追求一定嘅回報率。之不過投資資產五花八門,突然暴富又應該點部署?

　　短跑考爆發力,長跑就一定係靠穩陣,中咗頭獎嘅最正路選擇都係成立信託基金,按照美國國債十年孳息率每月出糧俾自己,剩餘嘅錢由專業嘅基金經理幫你打理,雖然交出嘅管理費難免

有啲心痛,而且預咗收益唔會高,但係總好過借錢俾表叔堂弟做生意吖。有咗安全網之後,幸運嘅你就可以諗下將剩低嘅錢投資到較高風險嘅資產啦。

　　筆者愚見,今年應該避開投資嘅可能係加密貨幣。侵侵要向全球大打關稅戰,避險情緒急升溫,以太幣暴瀉三成,比特幣跌穿9.2萬美元,觸發爆倉潮,認真得人驚。比特幣雖然被吹噓為「數字黃金」,不過從投資風險嚟睇好難同黃金相提並論,而且喺高息環境下,資金更傾向於從加密貨幣回流花旗國市場,喺寬鬆政策未必能持續嘅當下,未必係好選擇。

　　如果買入美股七雄又如何?以近期股價大跳水嘅英偉達嚟做例子,雖然話DeepSeek證明研發AI大模型唔需要用到最高階嘅GPU,但係無論你係要研究咩領域嘅AI技術,都離唔開英偉達產品,對於英偉達而言只係賺多賺少嘅分別,AI晶片霸主地位暫時無可替代,買得過;至於蘋果要調用Open　AI模型嘅API去實現Apple　Intelligence大計,Open　AI減價同開放輕型模型,相當於AI成本低咗,絕對都係好事。

　　但係提到美股,就一定要睇實花旗國嘅通脹問題,如果通脹重新升溫,美聯儲唔單止唔減息,仲轉頭加息,美股就好有機會進入大調整。仲記得2022年美聯儲大加息,科技股跌到媽都唔認得,英偉達都跌過六成。

　　阿媽教落買金就最穩陣,而喺2025年,買金甚至都可能係最賺嘅選擇。特朗普一向標榜自己係不可預測嘅wildcard,未知就係風險,有風險就要避險,再加上全球局勢未如侵侵所願「即刻」恢復和平,黃金仍然有得追,有唔少大行睇好今年嘅金價會上5000美元關!加上黃金具備保值屬性,就算要貶值,速度都唔會似加密貨幣咁刺激,就算一覺瞓到大天光,都唔驚輸晒身家,

　　另外,好多網民都會話中咗獎要攞幾百萬去唔知邊度買個豪宅單位,開心下,呢個想法喺前幾年都仲成立嘅,今年就……搵個地方租住先啦,唔急嘅,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。