《小傳日記》TikTok未禁再來小紅書,美國政府禁得幾多?

　　《小傳日記》字節跳動旗下短片社交平台TikTok在美國面臨「唔賣就禁」大限,大批自稱「TikTok難民」的用戶湧入小紅書,令小紅書喺美國嘅下載量急升,該應用軟件已連續兩日登上美國iOS免費app下載榜榜首,噚天喺Google　Play應用商店亦急升42位,衝上第二位。而由字節跳動開發嘅替代產品「Lemon8」同樣躋身前列。根據小紅書數據,「TikToK難民」標籤的瀏覽量已經超過1.4億。

　　雖然小紅書近年喺內地發展迅速,但比起有8億用戶嘅抖音,仲係有一段距離,因此,市場習慣將抖音列為第一梯隊,而小紅書列為第二梯隊。市場估計該平台擁有3億幾用戶,喺香港、東南亞、美國等市場的用戶達百萬級別,主要面向華人社區,以中文內容為主。由於對國際市場並無太多著墨,亦無針對海內外用戶對內容分區,而且平台尚未上線翻譯功能。因應「TikTok難民」湧入,小紅書近日先開始緊急招聘英文內容審核員,以應付需求。

　　眾所周知,TikTok嘅原型係內地抖音,無得用TikTok,點解唔乾脆走去用TikTok內地版抖音?而去幫襯一個次一級嘅平台小紅書?純粹係因為TikTok創作者嘅推薦?當然唔係!皆因抖音需要內地或香港手機號碼先可以註冊。相反,小紅書唔需要手機號碼,註冊相對簡單,可以話係目前碩果僅存容許境外註冊嘅內地社交媒體。

　　TikTok同小紅書產品本質都有所分別,小紅書嘅設計比較接近圖文分享平台Instagram,不過亦因為如此,對美國用戶來講會比較容易適應。咁點解唔直接用Instagram就好?道理好簡單,用戶志在表達對美國政府禁用TikTok嘅不滿,鬥氣心態居多。

　　網絡世界真係難以預測,有邊個諗到TikTok被禁竟然幫咗小紅書?唔單止美國政府意想不到,就連網民都始料不及。事態發展落去相信有兩個可能:其一,TikTok被禁,小紅書趁勢崛起;其二,TikTok無被禁(或賣盤),而小紅書進入海外網民嘅視線,逐漸擴大市場。無論邊一個可能性出現,相信花旗國政府都係輸家,俗語有云「偷雞唔到蝕把米」!

　　花旗國政府一向自詡民主開放,就算要禁用,都要行法律途徑,如果要制裁小紅書,又要走過一段漫長的法律程序。好似TikTok咁,由當初特朗普在位時就主張打壓,但係經過拜登

時代,而家特朗普都就嚟重新入主白宮,件事都仲未完。可想而知要浪費幾多時間同金錢,到頭來得不償失。何況,你有張良計,我有過牆梯,幾年後你想禁小紅書,我又開返個「小藍書」,到時將小紅書嘅用戶直接過到「小藍書」。退一步講,就算TikTok禁令真係喺19日生效,特朗普20日上台後,話唔定又推翻,實行「今日嘅我推翻昨日嘅我」。事實上,特朗普近期已經明確表態,話支持TikTok保留多一段時間。

　　無論係TikTok,定係小紅書,只要美國繼續開放畀全世界社交媒體自由出入,中國社交平台深入美國社會將會係無可避免嘅事,與其繼續糾纏落去,不如灑脫啲,貫徹自由開放政策。事實上,TikTok持續熱度不退,除咗因為佢嘅獨門「算法」,唔多唔少都因為兩任總統不斷幫佢做宣傳,呢幾年來大批媒體喺黃金時段高頻度、大篇幅報道,搞到TikTok家傳戶曉,想唔紅都難。而家TikTok紅遍全世界,搶咗美國同行唔少生意,Youtube同Meta而家都要積極搶佔短片市場,真係多得兩位老人家唔少,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。