《小傳日記》玄學經濟勝穀子經濟?明星水晶陣6999有人搶住買

　　《小傳日記》2025年啱啱開始,唔知大家揀好自己嘅開運水晶未?近排愈嚟愈多明星迷上水晶,喺小紅書或者直播間大講特講「能量」同「磁場」。伊能靜喺直播時話「水晶係大地之母送俾人類嘅恩典,我哋活喺一個巨大嘅磁場入面,水晶通過佢嘅礦物能量同我哋感應」、「白水晶清淨磁場嘅能力最強」、「海紋石可以俾人有辨識好人壞人嘅能力」。聽到哩啲功效咁神奇,心思思想買返條水晶手鏈,話唔定連買股票都得心應手過人。

　　但係明星賣水晶係咪真心信佢嘅「能量」呢?好難講啦。近年嚟,身心靈療癒喺全球大熱,歐美明星例如卡戴珊、米蘭達可兒都成日喺社交媒體分享點樣用水晶冥想、改運。喺呢股風潮底下,水晶自然成為咗明星帶貨嘅新寵。

　　但更重要嘅係,天然水晶係非標品(即係不符合標準化、規模化生產嘅商品),同藝術品一樣冇固定價格,你話佢幾錢就幾錢,一條水晶手串值100蚊定1000蚊?冇人知答案,於是乎呢個特性俾咗明星直播一個超大嘅發揮空間,定價自由,利潤高到你唔敢信,而如果有人立心不良,將人工水晶當天然水晶賣,咁利潤仲可以「up　up　up」。

　　伊能靜喺直播間賣「豪華水晶陣」,盛惠6999銀人仔,一晚賣咗381件,單單呢一樣商品就有266萬人仔嘅銷售額;內地知名編劇于正同藝人徐藝洋直播賣水晶,一場收入可以高達100至250萬,高價產品幾乎全部售罄。行內人話,水晶嘅毛利率可以由20%去到2000%。秒殺一眾奢侈品,喺玄學經濟面前,就連大家熱烈討論嘅「穀子經濟」都自愧不如。

　　而且,水晶仲幫明星避開咗直播界最難搞嘅價格戰。依家直播電商玩到極致,消費者都係貨比三家,邊度平就買邊度。明星喺賣標品(例如化妝品、食品)就完全爭唔過頂流一哥李佳琦,冇價格優勢就好難賣得好,惟有扭盡六壬靠流量變現。至於水晶賽道就唔同啦,你塊水晶同我塊水晶都唔同,乜乜清潔磁場乜乜七大脈輪,講完一通術語就可以將水晶包裝成兩種完全唔同功效嘅產品,於是明星話值幾多就值幾多,粉絲信得過買得起,輕鬆變現。

　　見到明星靠水晶賺大錢,可能大家都心郁郁,諗住入場分杯羹,小紅書上亦有大量嘅創業教程。不過大家記得唔好盲舂舂衝入低端市場,百幾蚊嘅水晶手串喺淘寶已經賣到爛,市場同質化極嚴重,普通創業者根本玩唔嚟。至於中高端市場賣貴價水晶,就唔單止要靠靚嘅水晶本身,仲要有創意設計、流量加持,加埋一啲玄學包裝,講個好故事俾客仔聽,咁先可能賣得出。試問一個睇落都唔夠「福氣」嘅普通人,六合彩都冇中過,啲客又點解相信你嘅水晶可以改運?如果要做玄學生意,我建議就不如追趕《破.地獄》熱潮,嚟一場online破地獄,線上表演舞劍劈瓦,又有娛樂性又可以改運,仲可以做埋直播打賞,分分鐘做埋殯儀界KOL,不過只怕祖師爺未必鍾意,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。