《小傳日記》蔚來ET9貴過歐系豪車!80萬人仔你肯唔肯買?

　　《小傳日記》「再不努力,就只能開BBA(平治、寶馬、奧迪)!」近日蔚來(09866-HK)發布旗艦轎車ET9後,哩句金句又被神州網友攞出嚟貼堂。事關ET9賣價直接標到78.8萬人仔,首發限定版仲要再貴多3萬人仔,有網友直言80萬人仔駛乜買國產電車,夠買平治S系列或者寶馬7啦。

　　蔚來ET9定位高端行政級豪車,對標嘅就係平治S級、寶馬7系同奧迪A8,但事實上ET9嘅價錢比佢哋都仲要貴,奧迪A8入門款50幾萬人仔,寶馬7系60幾萬人仔,而平治S級嘅售價都壓到70幾萬人仔。ET9出價相當進取,基本上係直接踩喺佢哋頭頂,向世界宣布自己比豪車更豪。

　　豪唔豪就唔係單靠自己講嘅,為咗證明自己係豪車,蔚來喺發布會上搞咗一場減速帶測試,將ET9同邁巴赫S級擺埋一齊比拼。畫面入面,ET9過減速帶好似行平路咁,而邁巴赫S就搖頭晃腦,其實呢啲「實測」片段,唔少神州公司都做過,當中可以「操作」嘅部分唔少,有唔少人篤爆,蔚來測試用嘅減速帶係專門為ET9嘅軸距設計。而邁巴赫S嘅軸距比ET9長咗15公分,咁樣比未免有啲唔公道。

　　講真,國產車要挑戰BBA,最難嘅唔係造唔到好車,而係點樣撼動BBA喺消費者心目中嗰種「高級同豪華」嘅形象。BBA幾十年嘅品牌沉澱,已經等於身份、地位同面子嘅象徵,大家買BBA唔淨係為咗隻車,而係為咗背後嗰種「有排面」嘅感覺,尤其是出到外國,有幾多人認得出蔚來嘅車標?舉個唔太貼切嘅比喻,名牌手袋縱使用料再靚,現代工藝之下嘅成本價有幾多大家心知肚明,但只要放個logo上去售價就可以翻個兩番。

　　而蔚來作為一個新品牌,雖然呢幾年靠換電模式同社群營銷攞咗唔少年輕人嘅心,差在品牌成立時間較短,冇嗰種「old　money」嘅氣質,無論係品牌調性同知名度上都難以同BBA比較。蔚來要打造高端汽車嘅定位,就要不斷提升品牌形象和知名度,但從今年第三季度蔚來嘅財報睇出,蔚來為咗維持品牌形象同市場推廣,燒咗唔少錢,導致虧損壓力越嚟越大。

　　再講返蔚來嘅核心用戶年齡較為年輕,主力車型ET5同ES6嘅車主平均年齡得廿幾歲,但當ET9呢個78.8萬人仔嘅天價出現嘅時候,年輕車主多數都負擔唔起,老人家偏保守傾向用番老牌子,蔚來想喺呢個價位搵增量就相當困難。簡單啲講,ET9嘅目標用戶喺邊,係一個大問題。

　　雖然李斌話首批999台ET9已經搶購一空,但呢啲數字唔代表太多嘢,真實嘅市場反應,仲要睇上牌量同長期銷量。長線而言,新能源車市場競爭激烈,特斯拉、小鵬(09868-HK)、理想(02015-HK)、比亞迪(01211-HK)對豪車市場都虎視眈眈,蔚來要突圍,真係難上加難,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。