《小傳日記》特設「東廠」畀馬斯克揸旗?用人唯親定削赤可期?

　　《小傳日記》特朗普勝選後磨拳擦掌,鏘鏘有力嘅鐵腕未上任已經火花四起,組閣過程當然少不了論功行賞,多名「侵粉」水鬼升城隍,連新聞主持嘅退伍軍人都可以提名做國防部長,驚動五角大樓全體高層!既然係咁,出錢又出力嘅「頭號侵粉」馬斯克又點可以少咗佢嗰份?阿侵對馬斯克委以重任,特別成立「政府效率部」,畀佢同生物科技企業家Ramaswamy共同打骰。

　　特朗普競選嗰時曾經提到,假如今次再輸就唔會再選,破釜沉舟嘅氣勢果然贏得支持,七大搖擺州一個不漏全贏,真正係大獲全勝。敗部復活嘅特朗普今次明顯同上次唔同,在野呢四年嚟經歷被禁言、被起訴等等,佢深知今次重返白宮將會係佢「撥亂反正」嘅大好機會,而且唔會再有下一個四年,特朗普今次當選之後作風明顯比上一次更加強硬,尤其喺人事任命上連黨友都震驚。

　　所謂「狠心亦係有心」,特朗普今次誓要做到「狠而無心」,史無前例特設嘅「政府效率部」就係一大重點。民主黨拜登四年任期聯邦政府赤字飆升,更加試過幾次因為預算問題而差啲令聯邦政府局部停擺(雖然特朗普任內都曾經因為美墨圍牆爭拗而令聯邦政府停擺),突破性成立「政府效率部」就係要解決預算運用嘅問題。「赤字」即係入不敷支,搵有能力豬籠入水嘅人嚟「轉虧為盈」係理所當然,喺大選後身家暴漲到成為世界首富嘅馬斯克就係降本增效能手,由成功商人為聯邦政府減少財赤邏輯上的確難以挑剔。

Efficiency」,簡稱「DOGE」,同馬斯克力推嘅狗狗幣撞名,今次馬斯克仲唔係眾望所歸?一個不經意嘅meme,華麗轉身成為一隻加密貨幣,如今再堂堂正變身成拯救美國財赤嘅重要部門,相信Doge本尊在天之靈都無諗過會影響美國政局!特朗普提到DOGE嘅核心任務係要「瓦解官僚體系,削減多餘法規,減少浪費開支,重組聯邦機構」,四大任務聽落任重道遠,只不過特朗普強調,呢個部門只會運作大約一年半,呢段期間內會同管理預算局合作進行改革,希望喺2026年7月4日《獨立宣言》簽署250周年當日完成任務。

　　據報DOGE強調係由「外部顧問」提供建議同指導,因此馬斯克嘅職位大有可能唔係政府成員之一,暗示佢嘅行動未必需要經過參議院批准,同時亦都可以保留佢喺Tesla同X嘅職務。「瓦解官僚體系」聽落擲地有聲,目前部門未開始運作,未知道究竟有幾大權力,假如同管理預算局合作研究嘅方案最終係可以落實,加上有特朗普上任總統最大武器--行政命令作為加持,DOGE有可能會成為「東廠」咁嘅直屬部門,喺聯邦政府嘅話事權可以好大。但唔理黑貓定白貓,捉到老鼠就係好貓,假如DOGE身為一隻「狗」真係可以「捉到老鼠」削減財赤,咁就真係狗都可以變成貓,共和黨人面對成果都無說話好講,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。