《小傳日記》丘鈦半年賺多過四倍!多得最大客仔密密出機唔怕攰?

　　《小傳日記》魚缸愈來愈乾塘,今日仲連700億銀都差啲唔過,個個都話係等埋QQ(00700-HK)放榜先部署,個個都咁高期望,萬一QQ變「撻Q」咪死?不過呢排「Q」字行運,可能QQ都會有好報,今日隻Q　TECH(01478-HK)就單日大升咗一成七。

　　丘鈦中期成績表強勁,純利大增4.54倍,淨賺1.15億人仔,收益多四成去到超過76億人仔,毛利4億人仔都翻咗一倍有多。噚日中午放榜,績後都無乜表現,但時隔一日多得大行加持唱好之後,今日就即刻大翻身,果然幾好成績都要有人大聲唱通街先得。

　　丘鈦成績表就講到,呢半年攝像鏡頭銷售量多咗三成有多,其中用於智能汽車同物聯網嘅智能攝像鏡頭銷量更加大增一倍,令集團營業額實現快速增長,應該就係今次成績表之中比較重要嘅新引擎。丘鈦又回顧返上年度業績提到嘅2024年收入指引,今次中期無論喺整體鏡頭銷量、車載鏡頭以及手機鏡頭方面,全部目標都超額完成,係真正嘅表現好過預期,難怪都要賣花讚花香。

　　雖然孖屐成日都將丘鈦歸類為蘋果概念股,不過實際上蘋果並唔係丘鈦嘅客戶,只係平時炒開設備股順手炒埋。據丘鈦今次中期績公布,期內最大客戶貢獻超過22億人仔收入,佔期內總收入超過兩成八,同一客戶帶來嘅收入亦比上年同期大增超過四成半。據丘鈦旗下丘鈦微之前招股書透露,直到2022上半年公司第一同第二大客戶分別係OPPO同vivo。

緊即將會喺10月發布Find　X8系列,咁樣嘅出機速度的確大有可能要加大鏡頭訂貨量,OPPO亦大有可能就係喺上半年貢獻丘鈦22億人仔收入嘅最大客戶,如果OPPO繼續保持咁高速嘅出機速度,丘鈦下半年嘅成績都有保證啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。