《小傳日記》茶飲業進入冰河時期,推動內需可能等到茶涼!

　　《小傳日記》友人三十幾年前去過台北,自始就因要照顧行動不便嘅老母無再去,但二十多年前反而去過美國出席親戚婚禮。最近友人突然想去台北走一轉,仲同我講話想喺台北飲吓茶,即係好似香港人朝朝走去茶樓嗰種飲茶。

　　我諗咗陣,突然發現,係喎,我去得台北多,但真係冇飲過茶,亦唔見有茶樓之類,於是上網查吓,發現原來台灣係唔興飲茶(茶飲就多),原因係個個一早要返工,邊樹咁得閒飲茶!當然亦都可能同文化差異有關。於是我叫友人唔使諗,要飲茶,留喺酒店自己沖算啦!

　　既然講到茶,當然要望吓啲茶股啦!不過冇隻好樣,今年4月23號先上市嘅茶百道(02555-HK)今日跌到7.5銀,再創上市新低;舊年12月上市嘅瀾滄古茶(06911-HK)

就微跌0.5%,收報5.58銀,成交得1200股。2021年上嘅奈雪的茶(02150-HK)收報1.74銀,無升跌,高低位分別係1.75銀同1.73銀。

　　據報內茶飲業大劈價,多家主流現製茶飲品牌近幾個月來,集中推出9.9銀人仔嘅促銷活動,茶百道通過第三方平台推出9.9銀人仔中杯6選1優惠,小程序添加社群後可享有一個月9.9銀人仔飲指定飲品券,但只對部分商品有效;喜茶7月中旬喺上海、杭州、青島等全國多地多家新店開業,集體推出9銀人仔飲喜茶同抽獎活動;奈雪的茶亦通過第三方平台推出咖啡系列9.9超值早餐活動。

　　近年茶飲業競爭激烈,原本標價20銀人仔以上價格嘅喜茶、奈雪的茶等高端茶飲品牌,不斷推出輕果茶、輕乳茶等新品,搶奪低價市場。雖則話益咗好茶一族,但亦令擔心,連茶飲都要劈價爭奪市場,可謂進入冰河時期,內地內需確係令人擔心,係咪可以憑以舊換新就可以推動經濟增長!幾隻茶股暫勿沾手。(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。