《小傳日記》華潤飲料遞表!振興魚缸都係要靠阿爺出招!

　　《小傳日記》近期市道好返,魚缸即刻多返好多公司遞表上市,有大有細,各行各業都有,就連國企都想食到呢轉東風,華潤集團旗下華潤飲料就喺上個禮拜遞表。

　　有「華潤」兩隻字就已經知係國企大隻嘢,而華潤飲料旗下最大品牌就係「怡寶」,難怪喺今次遞表之前,怡寶加強咗在港攻勢,大賣巴士車身廣告,仲正式上架多間大型超市,原來就係好似蜜雪冰城咁為上市鋪路。怡寳前身係中國龍環,1991年被萬科(02202-HK)收購入主,再到1996年先由華潤創業全面收購。

　　「潤飲」招股書都大賣自己國企背景,提到目前華潤集團旗下有9間公司A場上市,而魚缸就有8間,分別仲有潤啤(00291-HK)、潤電(00836-HK)、潤地(01109-HK)同華潤萬象(01209-HK)係藍籌,數起上嚟真係威過其他細奀股。

　　睇返公司按產品種類收入分布,飲用水產品喺2021年至2023年都佔公司收入超過九成,而其他飲料產品到2023年都係得8%左右,即係都係賣水股就咁睇就係對標魚缸著名「水股」農夫山泉(09633-HK)。而農夫山泉走勢都靜如止水咗好耐,到近期先因為是是非非有啲波動,可以見到賣水其實都係穩陣生意。

　　睇返過去三年數據,華潤飲料年內利潤都係穩步上揚,三年利潤分別係8.58億人仔、9.89億人仔同13.31億人仔,三年毛利率分別係43.8%、41.7%同44.7%,業務都偏向穩定。招股書初步顥示集資用途,未有詳細佔比之下頭三個分別係「戰略性擴張和優化產能」、「加速銷售渠道擴張」同「銷售和營銷活動」。

　　其實以飲料行業嚟講,雖然擴張都要錢,但論急嘅程度一定唔及間接對手茶飲行業,唔排除呢個時候分拆,都係響應阿爺希望振興一吓魚缸嘅呼籲。咁的確有國企敲鑼都係比較矚目,相信亦都會吸引多啲大錢抽新股,寄望可以刷新今年最高嘅IPO規模啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。