《小傳日記》電視廣播首季廣告收入升,上半年有望轉賺,全年呢?

　　《小傳日記》經歷上周五(19日)以色列與伊朗關係轉趨緊張帶來的震盪後,恒指今日顯著反彈。升市之中見到一個稀客--電視廣播(00511-HK),今日股價最高升逾一成,收市升逾6%。原來集團今日公布今年首季營運資料,本地廣告收入上升,比舊年同期有雙位數百分比增長,部分歸因於集團維持舊年第四季單價水平。

　　集團公布,部分已經一段時間無投放廣告嘅藍籌客戶,已經重新投放廣告。集團預計呢種趨勢會持續,加上潛在嘅新客戶,將有助於集團全年廣告收入較2023年有所增長。預期集團今年上半年將會錄得淨利潤,並在2024年全年有機會實現正數EBITDA。

　　集團管理層咁有信心,自然可喜可賀。又係嘅,集團過去五年一直都蝕緊錢,最近呢兩年(2022年同2023年)講緊一年蝕7、8億銀。一間市值大約13億嘅公司,一年蝕7、8億,都咪話唔揦脷。而家止蝕在望,梗係好事啦!不過係唔係代表股價已經見底?呢個問題怕且唔係咁簡單。

　　首先,今時今日電視娛樂早已不復當年興旺,來自各種社交平台,每日接收嘅信息多到睇唔曬。仲有幾多人會追電視節目?後生仔女就算追電視劇,除咗本地劇,網上仲有其他地方,例如內地,美日韓台,甚至泰國等地嘅電視劇競爭。年紀大又社交生活不活躍嘅粉絲或者會堅持留守,但呢批「熟粉」又唔係社會主力消費群,對於廣告商來講,佢地嘅潛在價值有幾大?

　　除咗海外競爭,生活模式同消費模式嘅改變,亦係主因。以前的產品要接觸消費者,最簡單直接嘅途徑,就係電視廣告。但今時今日,社交媒體,網紅帶貨直播無孔不入,甚至網購平台本

身就是最好的廣告平台。以前,超市除了在電視廣告有長期廣告,仲會有每周特價產品廣告。但喺呢個網購年代,消費者直接登入超市選購,所有價格一目了然。難怪而家超市廣告已經愈來愈少,未來電視廣告嘅整體趨勢恐怕大同小異。

　　就算今年首季廣告因為之前基數低有所回升,但升勢可以維持幾耐?集團就算今年上半年真係轉為淨利潤,具體淨利潤金額有幾多?相信好多投資者都會有疑問。要留意一下,講緊嘅淨利潤係上半年。而全年呢?係正數EBITDA,無人講全年淨利潤,所以大家睇嘢要金睛火眼先得。

　　其實而家AI大行其道,做直播都可以揾AI搞掂,未來嘅電視台大可以考慮下揾AI做主角。要幾靚有幾靚,聽教又聽話,包保唔會跳巢,電視台仲可以節省唔少開支。或者到嗰時,電視台有望實現全年淨利潤,而唔係正數EBITDA咁簡單呢。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。