《小傳日記》解開星爺九五二七之迷,快手或憑微短劇得米!

　　《小傳日記》微短劇、微電影、短片已經有咗好多年,但又好似hit唔起。不過,喺資訊爆炸嘅年代,訊息只會有多無少,然以有涯除無涯,殆已!好多人鍾意睇日劇,都係貪佢節奏明快。據報近年內地興睇短劇,舊年市場規模就超過370億人仔。

　　「星爺」都心郁,同抖音合作,搞個「九五二七劇場」。呢度扯開少少話題,大家可能唔知點解叫「九五二七」,原來「星爺」啲戲,不論係警察定係監犯,個編號都好鍾意用「九五二七」,但我認為,用「九五八八」可能仲適合!點解?自己諗啦!

　　返回主題,根據艾媒諮詢數據,估計微短劇市場規模今年會超過500億人仔,2027年更加過千億。喺內地主打網絡短視頻同直播平台,仲有提供網上營銷服務等嘅快手

(01024-HK)亦睇中咗微短劇市場。快手個劇情業務負責人於軒,尋日喺成都召開嘅《短片與直播賦能產業高品質發展論壇》就話,集團將會同陳坤導演聯手推出快手首部AIGC微短劇,仲預告,快手平台將會喺4月底推出首部AIGC微短劇《山海奇鏡之劈波斬浪》。

　　快手舊年營業額增加20.5%至1134.7億人仔,股東應佔溢利接近64億人仔,扭虧為盈。快手應用嘅平均日活躍用戶增加6.8%至3.8億人,電商交易總額增加31.4%至超過1.18萬億人仔。不過,快手股價喺2021年11月25日正式失守100銀之後,一路都變唔番「紅底股」,最悲慘喺2022年10月底跌到31.75銀,之後反彈又跌過,依家喺50銀邊位,同「紅底」距離都差一半。如果微短劇大流行,快手重返「紅底股」行列唔係無可能。「微不足道」呢句成語可能會多個兄弟,就係「微足以道」。如果投資者睇好快手,要買可能真係要快手。請請!(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。