《小傳日記》理想MEGA孭唔夠數!一日最衰都係惡意P圖?

　　《小傳日記》車股曾經係孖屐最熱炒嘅板塊,但係玩家愈來愈多,終於令到市場飽和,汰弱留強嘅時代已經開始。理想(02015-HK)靠著高端配置同大車艙喺新勢力之中跑出,本來打算繼續針對用家對呢方面嘅喜好繼續落去,但係似乎已經摸到頂。

成績方面真係令人跌眼鏡。開賣第四日,已經有數據公布,理想MEGA落大訂嘅只有3218張單,撻訂嘅居然有超過10000架!可能連老闆李想都無諗過MEGA會跣軚成咁,以往新車開賣之後都會喺微博風騷曬成績,但今次當堂無咗影。

　　MEGA銷售撻Q,除咗可能係價錢太貴之外,車身太大令外型更加掗拃,已經逼近一架貨van咁大,可能因為咁,更加被人笑佢似靈車,仲P咗個「奠」字畀佢。雖然只係P相,但係都的確倒米,賣得好隨你P又點話,而家賣唔夠數,梗係崩口人忌崩口碗。事後理想高調反擊呢場「惡意P圖」,敲鑼打鼓要問責搞P圖嘅始作佣者。

　　又難怪理想被辣㷫,買新車始終都係好事,而且買得理想咁大架車嘅通常都係家庭客,被P圖變成靈車咁唔老黎,顧家嘅潛在買家又點會想畀屋企人咁唔吉利,所以或多或少都係對銷量有影響。

　　如果P圖真係有心人裝無心人,呢招可以話相當成功,大手一揮就可以令MEGA撻訂過萬張單,如今神州電動車業競爭咁大,硬招軟招揦鮓招都要出盡,所以同行出招嘅可能性都排除唔曬。但事已至此,比起打鑼咁對付P圖人,更加重要就係樣救返銷情。近期有傳理想計劃都要下調MEGA全年銷量目標由7至8萬架去到5至6萬架,但都未證實。

　　MEGA嘅成績反映對貴車嘅取態,貴唔係唔得,但貴得嚟都要物有所值。如今市場咁多選擇,要令消費者覺得物超所值先可以吸引到佢入手。同時都證明呢場車業內捲已經捲到要出揦鮓招嘅地步,所以蘋果都趁勢縮沙,都算係明智之舉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。