《小傳日記》安踏想致富,要靠瑜伽褲?

　　《小傳日記》魚缸回歸悶市,全日成交又得返700幾億,雖然有阿爺出手救市,不過都係救得一時,仲只係幾日光景,今日又跌穿咗條廿天線,睇來魚缸都仲未有起色。

　　雖然暫時神州經濟都比較弱,不過都無阻消費巨頭擴張。安踏(02020)就正式宣布收購上海運動品牌MAIA　ACTIVE超過七成半股權,令MAIA將會成為安踏間接非全資擁有附屬公司。MAIA係喺上海成立嘅瑜伽服裝品牌,主要針對客群都係女性。安踏無公布收購作價幾多,不過就話今次收購對集團女性業務係好好嘅補充,可以進一步強化集團的品牌組合。

　　而過往安踏都無特別針對瑜伽運動嘅產品線,以至於全個神州,MAIA都可以話係暫時最出名係做針對瑜伽服裝嘅牌子,所以安踏今次收購都可以話係慳咗唔少工夫。

　　講起瑜伽就不得不提瑜伽褲,雖然好多人都仲未睇得慣周街著住瑜伽褲周圍走嘅女士,不過真係愈來愈多人會咁樣著,可以話都已經係一種風格。而MAIA都係乘著呢個潮流,喺2021年銷售額突破3億人仔,年平均成長率更加有成1.66倍!更加就吸引到安踏直接收購佢。

　　當瑜伽褲已經成為一個潮流,究竟係因為要運動所以著瑜伽褲,定係為咗著瑜伽褲而運動,都已經講唔清,反正兩樣嘢都已經綑綁咗一齊,亦都令到好多女士多咗做運動,雖然可能只係為咗著瑜伽褲好睇啲,不過都係令到好多唔運動嘅女士都做多咗運動,令到gym　room入面都唔再只係得男士。

　　賣瑜伽褲最出名嘅一定係lululemon,由最初只係得瑜伽服裝,慢慢到其他運動服裝,到而家連男裝都出埋,已經搖身一變成為咗運動品牌,就可以見到發展有幾快,如今lululemon喺神州境內已經有過百間門市,所以安踏先要馬上收購MAIA,來填補返呢個缺口,咁先可以抵住lululemon擴張嘅攻勢。而MAIA亦係主打以亞洲女性體型剪裁,比起外國貨嘅lululemon,舒適度上應該會更加吸引到女性同胞,所以安踏今次都應該有得打!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。