《小傳日記》又核苷酸,又多肽,藥明康德搞咩古怪?

　　《小傳日記》魚缸繼續弱勢,雖然拗升上返17500,不過總成交都唔夠800億,咁樣頹升法都唔知升得幾耐。不過悶市總有奇葩,今日輪到醫藥股突圍,全線造好,其中最標青就係隻藥明康德(02359),最多曾急升超過8巴仙,一棍大破88銀同92銀阻力位,高見94.05銀,創2月中以來新高,睇來要上返110銀都唔係難事。

　　而消息方面,藥明康德公布旗下附屬上海合全藥業,喺常州同泰興兩個生產基地,分別都擴建多肽生產線產能,希望提升WuXi　TIDES平台嘅能力同產能,新產能預計今年12月投入使用,到時公司嘅多肽固相合成反應釜體積將會由2萬升增加到3.2萬升。藥明康德就提到,WuXi　TIDES係點到點CRDMO(共同研究、開發與生產)平台,可以為寡核苷酸、多肽等等相關化學偶聯藥物提供CMC研究以至生產嘅一站式服務。

　　就咁睇啲化學名詞都幾難明,不過其實係平時常見嘅。多肽係蛋白質嘅組成分子,不過結構簡單一啲,亦都更加容易被人體吸收。而核苷酸就係組成DNA嘅基本單位,其中一種近期最常見嘅核苷酸,就係煙酰胺單核苷酸,亦即係NMN。

　　有睇廣告都會見過近年好多間保健品公司都開始賣NMN,經常廣告都會用「逆齡」等等字眼來強調功效。網上資料見到,NMN可以轉化成NAD+,促進新陳代謝、活化體內的長壽蛋白、修復受損DNA等等功效。功效多多,不過單係一句「逆齡」就已經令NMN熱爆,加上多肽可以為身體補充膠原蛋白,提升皮膚彈性,令到間間保健品公司都爭住開賣呢類產品。

　　所以,藥明康德擴大多肽生產線產能,正正係搶攻美容保健品嘅上游市場,女人錢容易搵,所以今日孖屐都借勢炒上藥明康德,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。