《小傳日記》依家搵股投資真淒慘,可幸有三大電訊股揀!

　　《小傳日記》「七翻身」真係準!恒指7月31日高見20361之後就反轉,不過係向下,由8月初到8月14日,恒指蒸發咗1465點,今年以嚟就唔見咗超過13%。今朝人行宣布下調1年期MLF利率15個基點,至2.5厘,同埋下調逆回購操作利率10個基點,7天期降至1.8厘,兩項措施合共淨投放1990億元人民幣。不過港股冇乜正面反應,你睇碧桂園(02007)企穩藍籌升幅榜首,個市都照跌就知,投資者依家重點關注內地整體經濟表現啦!

　　下晝返嚟恒指仲跌多咗,最低見過18513。依家要搵隻又要穩陣,又要賺息兼賺價,又唔受政策面影響嘅股票唔容易,但又唔係冇嘅,三隻內地電訊股就可以考慮。以穩陣計,今年以

嚟中移動(00941)累積升幅超過33%;中電信(00728)升幅超過27%,隻中聯通(00762)都累升超過13%。依家三隻電訊股仲企喺相對高位,穩陣喇啩?

　　業績方面,三大電訊股截至2023年6月30日止中期純利均有所增長。中移動中期純利按年升8.4%至762億元人民幣,派息增加10.5%至2.43港元。中電信中期純利

201.53億元人民幣,按年升10.18%;每股基本盈利0.22元,派發中期息0.1432元。中聯通中期純利按年升13%,連續7年雙位數增長,派息增23%至20.3分人民幣,派息比率提高至50%,並表明今年派息比率會較去年有所提升。

　　三隻之中以中移動技術走勢較佳,中移動上周五(11日)突破日線圖平頂上升三角形阻力65.85銀,今早曾經升到67銀。恒指連跌三日,中移動就連升三日,突破5月份高位67.99銀睇嚟實食冇黐牙!度一度,超短線目標大約係67.1銀,即係同高位差1毫,高追唔值博,即管睇吓有冇機會落番去66銀買啦。

　　如果以突破平頂上升三角去度,上升目標就遠好多,可以升到71.26銀,即係接近2019年嘅高位71.3銀,到時會唔會以大雙頂回落就唔知,但以現價66.85計都有6.6%潛在升幅,OK啦!請請!(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。