《小傳日記》單日暴跌九成七,證監一定睇到實?

　　《小傳日記》證監會噚日出聲明,話觀察到某啲未獲發牌嘅虛擬資產交易平台使用不當嘅經營手法,訛稱已經同證監提交牌照申請,話呢啲失實而又誤導嘅聲稱會令公眾誤以為個交易平台係符合證監會嘅監管規定。

　　證監又話,目前只係提供緊喺規管虛擬資產服務提供者新制度下嘅過渡安排,如果有人以為自己合資格喺過渡安排下被當作為獲發牌,即使係咁,證監之後都可以有權拒絕發牌畀佢哋。

　　不過證監咁好眼力「觀察到」有平台未有牌就以為自己有牌,唔知又觀唔觀察到惠陶集團(8238)噚日暴跌咗九成七。九成七都已經可以話差唔多「歸零Go」,比起3月開始抽升嗰排都仲要跌多咗。

　　其實魚缸間唔時都會有股份忽然遭洗倉,但係只有少數最後發現係有人背後操盤,譬如早排就好高調咁拉咗堆微信女,然後就無然後。而到今日為止惠陶都未出返份通告解釋點解暴跌九成七,連「公司不知悉股價波動原因」都未有,反而就有份通告話將會喺8月15號開董事會會議審議通過中期業績嘅會議。

　　雖然身為投資者都有責任小心誤墮妖股陷阱,雖然證監高調地拉咗一班微信女,不過WhatsApp都仲係成日有「老師group」指點人買邊隻邊隻股,唔知證監幾時會好眼力到捉到多幾個疑似唱高散貨嘅主腦呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。