《小傳日記》小鵬出年殺到來香港!佢哋話團購又係咪口侃侃?

　　《小傳日記》魚缸跌夠4個交易日都唔夠,到今日都時升時跌,最後都係守唔住升幅要跌95點,成交又得嗰800幾億銀,真係想升都難!

　　今日咩板都跌,不過電力股同車股就逆市向上,小鵬(09868)都升差唔多兩巴仙。呢幾日就講緊,小鵬有機會喺出年,喺香港推出公司第一架右軚車。有報道就引述小鵬副董事長兼

總裁顧宏地,佢話將會喺香港推出一款唔同於街頭現有嘅電動車車型,仲會以「先進技術和獨特設計」吸引本地客,加強公司殺出神州戰略,預計將會喺出年年底上市。

　　如小鵬殺到來香港,咁又會多個競爭對手。啱啱BYD(01211)先疑似喺香港發展太快,招來紅油之災,小鵬再侵一份,會唔會令原本嘅本地市場人士更加坐唔住腳呢?不過有競爭先係好事,阿爺一向都鼓勵百花齊放,又點可以話自己做曬呢?

　　不過小鵬喺香港都唔怕無生意做,因為之前港區人大就上咗大灣區考察,期間就參觀過小鵬車廠,仲試坐過新出嘅G6,開心起來成班人大代表仲話要「團購」小鵬車,金口一開唔知到時會唔會兌現嘞。

　　BYD係第一間進軍香港嘅神州電車公司,據報喺香港務銷量一直穩定上升當中,今年1月嘅新車登記量更加成功爬過Tesla成為當月No.1,唔知小鵬可唔可以複製BYD嘅成功

,不過有BYD呢架「前車」,小鵬點落來香港都可以多啲參考,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。