《小傳日記》競委會出手!熊貓袋鼠要硬食,美團攻港唔細力!

　　《小傳日記》傾咗好幾日嘅美債上限法案,今朝(1日)終於正式喺眾議院通過,魚缸今日最多升成200幾點,不過尾盤又回軟,仲轉跌,最終微跌十幾點。

　　而今日帶動大市嘅火車頭都係科技股,雖然臨尾收油,不過跌得殘嘅美團(03690)最尾都升差唔多3巴仙。話說美團上星期啱啱喺香江剪綵,旗下KeeTa正式推出。雖然據講反應唔錯,上市第一日嘅生意額都符合美團預期,不過有唔少孖屐中人都睇淡KeeTa發展。主要原因都不外乎熊貓同袋鼠兩大巨頭,KeeTa一定要瘋狂燒錢先可以搶到「孖屐些牙」。而且都幾多人覺得,香江只係美團殺出海外市場嘅踏腳石。

　　不過今日嚟睇,美團對於殺出海外嘅野心都唔細。就喺今日,競爭事務委員會公布,話Foodpanda同Deliveroo同合作餐廳之間嘅獨家合作條文,有可能影響市場競爭,包括達成獨家合作會收少啲佣,以及限制合作餐廳透過自家銷售渠道或其他網上外賣平台賣平啲等等。競委會要求Foodpanda同Deliveroo　90日內要同競委會商討修訂及刪除相關條文的細節,而兩大平台都已經同意修訂條文。

　　據今日各大報道提到,競委會係接獲投訴之後展開調查,係邊個投訴都有不言而喻嘅感覺。

美團過往喺神洲同餓了麼爭崩頭,成日都會同餓了麼互告對方壟斷。橋唔怕舊,今次來到香江,面對熊貓同袋鼠兩大海外對手,反壟斷成為搶攻奇招。之前Uber　Eats敗走之前都無成功打破熊貓袋鼠嘅稱霸局面,如今一上場就即刻有份咁驚喜嘅見面禮,殺兩大巨頭一個措手不及。

　　以前美團受反壟斷法折磨嘅時候,熊貓袋鼠一直都隔岸觀火,如今身經百戰美團殺到來,仲帶埋「反壟斷」來做見面禮,相信熊貓袋鼠今次都要提高警惕,美團絕對同以前嘅手下敗將唔係同一級數,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。