《小傳日記》QQ註冊「每日Q崽」,多做運動先唔怕被打低?

　　《小傳日記》魚缸弱爆跌唔停!雖然美股升到吧吧聲,不過魚缸呢邊完全係死魚狀態,美團(03690)揸住份靚績反而跌到趴喺度,魚缸睇嚟有排弱。

　　今日有內媒報道,QQ(00700)正式登記申請註冊「每日Q崽」商標,以分類嚟講就係教育娛樂、健身器材類別,目前商標狀態就係「申請中」。

　　每日Q崽其實上年年尾就已經推出,以前QQ就推出過QQ寵物,不過2018年就已經停止營運,今次又重新打起「虛擬寵物」嘅主意,令到好多神州網民都回憶起QQ寵物。由平時嘅手機板QQ介面,揀清單入面「QBOX」,就可以開始養著咗老虎衫嘅QQ企鵝「Q崽」。而玩法都好似N年前大家玩嘅「他媽哥池」一樣,不外乎喂吓嘢食呀,換吓衫咁。不過有度幾唔同嘅就係養大咗隻「Q崽」之後就可以拎去同其他friend嘅「Q崽」打番場,要打贏就當然要平時照顧得好嚟提升戰力。

　　雖然目前都仲似係娛樂用途居多嘅放置式虛擬寵物,不過QQ申請專利係用「健身器材」類別就好似有啲唔同。因為QBOX主要玩法係養大自己隻「Q崽」去同人打過,而且申請商標叫「每日Q崽」,即係想人每日都入去。綜合以上提示,可能QBOX想做嘅最終模式就係一個運動app,鼓勵用家同隻「Q崽」一齊做運動,有可能就係統計用家每日步數,可能越行得多步數,隻「Q崽」就會進化得越快!不過目前都係估估吓,仲要等QQ方面發展落去。

　　其實如果每日Q崽最終係一個運動app都合情合理,以前QQ等等遊戲公司都曾經被官媒批評係「精神鴉片」,而之後阿爺都推出未成年人「限打機令」,如今以遊戲形式鼓勵人做運動,都算係有益身心呀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。