《小傳日記》TVB唔止做直播帶貨,內地股東可能會更多?

　　《小傳日記》TVB(00511)今日相當多消息公布,先講下舊年全年業績,年度虧損8.07億元,比2021年度虧損6.47億元擴大,收入就按年升24巴仙到35.86億元,而士多集團全年貢獻電子商貿收入,毛利增加四成到10.08億元。

　　放榜嘅同時,TVB都提到外界已經留意到公司嘅改革,陸續收到多方表達對投資公司嘅興趣,涉及約50間投行同機構投資者等,主要嚟自內地,亦預期將來投資者背景會更加豐富,內地股東數量會更多。

　　另外,TVB早前同淘寶合作直播帶貨,第一場直播銷售量超過2600萬元。節目內容營運總經理曾志偉大爆,原來今次同淘寶合作並唔係TVB主動提出,而是對方見到內地素人帶貨已到盡頭,希望以藝人帶貨為新方向,促成今次合作。他又指,未來會加強同內地合作製作節目,希望減低自身製作成本,靠合作製作提高收入同節目質素。

　　至於直播帶貨嘅內容,淘寶負責方指同TVB合作直播提供情懷價值,例如喺第一場直播中,即使觀眾聽唔明粵語,仍然要求藝人以粵語直播,而情懷價值可以吸引消費者入嚟直播間,並持續落單,長期追隨。

　　無論同淘寶合作直播帶貨,抑或股東背景,相信TVB嚟緊會著力發展內地「孖屐」。無疑,內地「孖屐」龐大,TVB可能從中收窄虧損,但本地市場搞得唔好嘅話,其實都會拖低業績表現,陣間搞到兩頭唔到岸仲大鑊喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。