《小傳日記》創科無懼沽空機構狙擊,績前出十一頁通告還擊!

　　《小傳日記》早排畀沽空機構狙擊嘅創科(00669),今日出咗一份11頁紙嘅通告,詳細解釋沽空機構針對嘅指控。創科特別提到沽空機構話公司無可能喺無借助「操縱性會計」同「玩弄會計數字」嘅情況下,連續10年期間,每半年度嘅毛利率均有所增加。

　　創科指,公司營運周期依賴快速開發高利潤嘅新產品,而該等新產品將為額外策略投資提供資金。毛利率增長和相關嘅策略性銷售同一般行政開支嘅再投資,創造咗良性循環,帶動毛利率有非常好嘅增長。

　　集團重申強烈否認所有指控,因為當中包含多種誹謗性、偏見性、選擇性、不準確同不完整嘅陳述,並且敦促股東謹慎處理沽空機構嘅報告。集團都同股東大派定心丸,話審核委員會已經調查報告內嘅指控,有關檢討結果令公司「更有信心該指控並無根據」。

　　今次創科咁認真整呢份通告,裏面有齊晒data同圖表,列得非常詳細,可能因為公司好快就會公布舊年業績,可能會對聽日嘅股價造成好大影響,出呢份通告至少令股東定一定驚先,費事又令股價chok得更加勁。事實上,呢間沽空機構創辦人不明,官網同Twitter喺2021年創立,並喺同年3月31日發表第一份沽空報告,至今共狙擊咗10間上市公司,唔少大行都對呢間沽空機構嘅指控提出質疑,加埋今次創科咁詳細嘅report,相信呢次狙擊持續時間唔會太耐呱!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。