《小傳日記》可以學術討論嘅聊天機械人,百度之外個個都做緊?

　　《小傳日記》呢幾日魚缸咁靜局,全市最熱恐怕都只係得百度(09888)嘅AI聊天機械人消息,熱爆程度令百度今日大升一成半!

　　話說今日百度終於承認將會推出類似ChatGPT嘅AI聊天機械人產品,正式公布叫做「文心一言」,英文名「ERNIE　Bot」,3月做完內測就會向公眾開放。「文心」本身

就係百度自己個AI平台,詳細啲講就係基於深度學習框架以上建構嘅大模型,本身已經係AI生成嘅一個程式,而文心一言就可以講係文心專注於同ChatGPT打對台嘅其中一部分。

　　ChatGPT面世至今只係兩個幾月,但就已經喺世界引起核彈級威力。講返ChatGPT係由OpenAI研發,而OpenAI其中一個創始人就係馬斯克,果然又係馬斯克嘅傑作。有人話,比起「前輩」SIRI,ChatGPT喺聊天機械人嘅功能上面已經屬於碾壓級。如果SIRI係當人無聊嘅時候可以傾吓偈,最多都係閒話家常,或者直接畀搜尋結果你,但係ChatGPT係可以學術討論,可以直接生成一篇論文出嚟。有外國網友就試過,用ChatGPT生成對話內容嚟同Adobe嘅客服講價,最終成功將月費撳低,仲可以用多90日免費試用,由此可見,ChatGPT嘅牙尖嘴利程度分分鐘可以落街市講價。

　　除咗百度之外,微軟、蘋果等等都緊急科水研發類似嘅AI機械人,最被嚴重威脅嘅Google都全力投資AI公司要扳回一城,真係好期待會有兩部聊天機械人一齊聊天,唔知會聊啲咩出嚟呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。