《小傳日記》科技內房齊齊升,贛鋒天齊未跌停?

　　《小傳日記》今日魚缸繼續升,科技內房升得勁。龍湖(00960)、碧服(06098)曾經升超過一成。有傳國務院金融穩定發展委員會上星期指導證券業同銀行業監管機構,就協助一啲重要內房企業,增強資產負債表,抓緊落實具體舉措。消息指,監管部門同金融機構可以根據監管指引同自身合規要求,制定新嘅優質房企白名單。內房呢個板塊對消息敏感度咁高,一有阿爺幫手救房企嘅消息,當然會升得興奮喇。

　　不過,今日資源類板塊表現曳,鋰礦股係重災區。贛鋒鋰業(01772)曾經跌超過5巴仙,同行對手天齊鋰業(09696)亦曾經跌超過3巴仙。呢個板塊跌咁多,可能因為碳酸鋰進口量上升有關。

　　有券商發表研究報告,指舊年11月碳酸鋰進口量回升,海外供給持續釋放估計會對價格帶嚟衝擊。券商又指,舊年以來鋰原料進口量持續增長,進口價格仍然低過現貨價,再加埋年底下游鋰鹽採購轉弱,對鋰鹽市場有好大打擊。券商預計,今年上半年鋰行業供應緊張局面難以緩解,隨住產業鏈去庫存同需求端回暖,鋰價可能到春節後先止跌,帶動鋰板塊反彈。

　　另一個搞到贛鋒同天齊下跌嘅原因,可能係Tesla第四季交付量為唔及分析預期,而2022年全年交付量仲未達到公司設定按年增長50%嘅目標。Tesla今年第一個交易日大跌超過一成二,創超過兩年嚟最大單日跌幅,拖累到相關概念股下跌,贛鋒同天齊當然走唔甩喇。

　　睇番贛鋒嘅日線圖,由舊年10月開始回升,不過12月初升到70銀有極大阻力,之後就碌樓梯式咁跌落去。呢排鋰礦股走勢比較弱,仲未係撈底時機,或者等到50銀附近先吸納喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。