《小傳日記》執二灘買樂樂茶?成績未出唔好亂估價!

　　《小傳日記》近期魚缸都係炒緊神州復常,所有相關股份都雞犬皆天,餐飲、體品甚至係賭股都有得升。而霉咗好一排嘅奈雪的茶(02150)唔覺唔覺都連升第7日,累計都升咗五成幾!

　　原來呢兩日奈雪自己都有消息,宣布用5.25億元人民幣透過收購兼增資持Lelecha　Cayman約85.08%股權,進而通過LC間接持有運營「樂樂茶」品

牌嘅上海茶田餐飲管理合共擴大後股本權益約43.64%股權。奈雪就話收購之後樂樂茶會成為聯營公司,並繼續維持獨立經營。

　　原來喺奈雪收購樂樂茶之前,早喺舊年7月就有傳喜茶有意收購,仲傳話樂樂茶值成40億人仔。不過之後喜茶老闆聶雲宸睇過樂樂茶盤數之後,就已經「徹底、完全、堅決放棄」。而奈雪都公布咗樂樂茶嘅狀況:2021年底,樂樂茶資產淨值係1.82億人仔,2020年、2021年品牌主營業務分別收入7.28億人仔和8.69億人仔,除稅後分別虧損2064萬人仔和1817萬人仔。奈雪方面就話有信心幫助樂樂茶進一步增長,亦都可以降低未來門店拓展、運營等方面成本。

　　就咁睇樂樂茶算收窄緊虧損,不過奈雪今年份中期業績都未算好標青,雖然好大部分都仲因為疫情而影響生意,不過喺業績仲未靚仔就大手收購,都未必無風險。雖然呢幾日叫升咗五成幾,但係近3日嘅陽燭上影線都好長,好有可能升唔到好長時間,始終而家都係炒佢敢逆市擴張,都唔係因為對盈利有咩期望,要穩陣嘅都係睇成績表先啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。