《小傳日記》被點名ＴＶＢ聲明反擊，其他台都有聲有「色」？

　　《小傳日記》噚晚花旗國就加息０﹒７５厘，但係就無出現預期嘅減慢加息預告，所以噚晚美股先跌後升再回吐，小股民就被玩到氹氹轉；而魚缸呢邊都要跟跌，裂口低開後淡友乘勝追擊，最終攻穿萬八點，將萬八點牛證重貨區殺清光，之後就反彈返些少，完場前叫企穩１８０００，收報１８１４７。

　　成交唔多但又備受關注嘅電視廣播（００５１１）近期都幾波動吓，上個禮拜五就忽然急跌咗一成，唔知係咩原因，但隨後政府就公布，之前因為參加咗「洪門宴」而辭職嘅前民政事務局局長徐英偉，即將加入ＴＶＢ嘅大家庭做主持。

　　但係一波未停一波又起，喺監警會舉行會議期間，講起點樣解決由童樂居虐兒案引發嘅對規管暴力同色情話題嗰陣，委員之一嘅前教育署署長余黎青萍就講起「近期啲電視同電影嘅色情暴力非常氾濫」，仲指名道姓提到ＴＶＢ即將舉行嘅《港姐》泳裝環節「個個著到少到不得了」，又點名ＴＶＢ總經理「瞪大眼望到實」。

　　隨後不甘被點名嘅ＴＶＢ就發聲明反擊，話「對於有個別人士以指名道姓方式對該台高級行政人員作出惡意及不實指控」，又話其他台都有搞，而「個別人士」嘅「言論存在針對性」，強烈譴責相關言論，仲要保留法律追究權利。不過隨後有唔少圈中人一齊抨擊余黎青萍，導演馮德倫就話，保護兒童固然重要，但將問題根源歸咎影視界，一來以偏概全，二來亦係對影視界嘅打擊。

　　的確，而家唔只係ＴＶＢ搞緊選美，前ＴＶＢ高層余詠珊回巢有線（０１０９７）開電視都搞緊類似泳裝選美節目，另外，電盈（００００８）旗下ＶｉｕＴＶ都有泳裝節目出緊街，難怪ＴＶＢ會對被指名道姓會咁大反應。不過對股價嚟講，之前跌完一成之後就反彈返７％，期間包括出聲明嘅時間，照咁睇，孖屐對份聲明算係受落，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。