《小傳日記》巴巴86億銀攻韓國!用「鈔」能力博一博?

　　《小傳日記》魚缸重上17000第三日就企唔穩!爭持咗全日,最後都係企唔穩,雖然爭持係預計之中,但重要關頭企唔穩一日都好大影響,可能短線真係要消化沽盤先。

　　今日主要重災區都係藥明系同AIA(01299-HK),反而科技股都算係跑贏大市,巴巴(09988-HK)都跌唔夠1%。有內媒就報道,巴巴正式宣布「攻韓」,計劃未來三年入面喺當地大灑11億美金,即係成86億銀港紙用作擴充業務。作為計劃頭炮,巴巴今年先掟兩億美金起一座物流中心,亦會另使一億美金幫助韓國中小企作海外推銷。

　　以往講起軟實力,都係由韓國為主導,由韓國輸出韓流文化,由Kpop到炸雞啤酒,都被視為韓國逐步提高對世界影響力嘅「軟招數」。如今巴巴加強在韓投資,可以話係噹噹聲硬招,以投資加強同當地合作。雖然目前暫時只係起物流中心,以巴巴老本行電商為主,但係巴巴有六大業務,雲服務、大文娛等等,都好有可能可以喺當地闖出一片天。

　　86億銀港紙嘅三年計劃,話多唔多,話少唔少,既係巴巴嘅投資,更加係代表中方嘅投資。提升到巴巴嘅影響力,亦提升到阿爺嘅影響力,面對來自西方嘅圍堵壓力,韓國好有可能就係神州打破圍堵嘅缺口。當然韓國方面都唔係唔知影響深遠,所以當地監管機構都有提高咗對來自中方嘅電商平台嘅監管,包括巴巴旗下Ali　Express同拼多多旗下Temu,都被審查對於消費者資料嘅處理情況。

　　86億銀都只係三年計劃,國際關係變幻莫測,三年時間正好進可攻退可守,亦適合雙方試一試水溫,如果夾得埋,又何妨繼續合作?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。