《小傳日記》個個都做電商,愈遲進場愈難上?

　　《小傳日記》拼多多跑贏巴巴(09988)震撼孖屐,差唔多炒得股嘅都一定有講起過。

　　今日美團(03690)公布旗下自營零售品牌「美團買菜」升級,即日改名做「小象超市」,正式喺北京、上海、廣州、深圳、武漢、蘇州等多個城市上線。小象超市定位為「30分鍾

快送超市」,提供一站式買餸兼送上門。尤其新logo入面標明「美團自營」,即係美團未來唔只係「為他人作嫁衣」係親自作為電商賣貨。

　　電商業務就係吸引到公司不顧一切都要做,做補習嘅去做電商,做電視嘅又做電商,做外賣嘅都做電商。個個都做電商,就係貪電商高流量、快回本嘅特色,所以唔少得返半條命嘅公司,都係靠電商翻身,東方甄選(01797)同HKTVmall(01137)就係成功例子。

　　而家神州消費力低下,呢個關頭做電商都係鬥平,主攻下沉市場,好少人再行京東(09618)賣出高端產品嘅路線,多數都係賣餸,因為可以唔shopping,但唔可以唔開飯,餸係一定要買。所以當初東方甄選轉行第一炮都係賣農產品,貪嘅就係嗰種「必要性」。

　　美團而家都搶住做買餸,但係拼多多、盒馬、東方甄選,再細啲仲有叮咚買菜,都係買餸app,美團再做都只係年晚煎堆,為免個餅被人分薄。

　　不過電商一定要高流量先可以實現快回本嘅特色,但係喺香港只係得800萬人,多人極都好難複製到神州情況,所以兩間本地嘅電商嘅處境就會比較尷尬。今年以來美團大舉攻港,半年多啲已經送?全港,如果美團係咁銳意做買餸市場,亦都正好解釋點解HKTVmall呢個年 尾要大力宣傳買餸方便,正好預先提防美團打蛇隨棍上。香港人習慣好難改變,做咗第一個買餸app,第二個買餸app進場就會提高難度,第三個就更加難,所以HKTVmall就正係想以最快速度、有幾多得幾多搶佔電子買餸嘅份額,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。