《魚缸博客》港匯跌到7.8,堅持多幾個月的話業主們有福了!

　　《魚缸博客》呢個幾兩個禮拜,其實相信大部份人同博客一樣,已經無心睇個市,而係日日睇實港匯同HIBOR,皆因港匯跌到落7.8,今日最新一個月HIBOR落到1.329。

　　大貓分析師就話,因為近期大型新股同埋要派股息,所以短期內資金水浸。博客睇完都係得啖笑,自從有左FINI系統之後,「凍資王」呢幾隻字都就快絕響,資金根本唔需要鎖死,而近期最大新股都係寧德時代(03750-HK),但都好似無咩氣氛;派股息就更好笑啦,呢兩年公司生意都未做得好,哪裏有錢派股息呢?

　　所以銀行體系結餘提升,最簡單直接理解:資金去香港避險。因為呢個月突然有千幾億熱錢流入香港,搞到金管局射水降溫。兌換貨幣本身係會有損耗,大孖沙唔會無緣無故咁樣換咁大額錢落香港,必然有風險因素先要落香港或者其他亞洲市場避險。

　　不過關鍵在於,呢筆錢係咪可以係香港留到兩三個月,如果可以的話,證明呢筆錢確實落戶香港。水浸眼眉,香港班供供們就有福了,因為H按一路都係供緊3.5%呢個CAP,呢個月

大大話話跌足1厘有多,450萬樓供少左接近兩千蚊,真係隨時凍飲加兩蚊再叫多十杯都無問題。

　　而如果HIBOR確定維持低息,即係話「供平過租」時代來臨,預計樓市有轉角訊號,至於係咪轉角可以遇到「愛」,就要睇香港經濟前景,不過肯定的是,業主們可以鬆一口氣先啦!

《編者按》本欄搜羅即市傳聞,惟消息未經證實,《經濟通》亦不保證內容之準確性。