《小傳日記》千股懸案?魯大師急升急降,證監無嘢講?

　　《小傳日記》證監會近期貴人事忙,正係全力調查「唔聽話」嘅JPEX,魚缸有奇怪嘢發生都睇得唔係好清楚。魯大師(03601)今個月以來嘅「花式跳水」可能仲好睇過亞運,散戶嘅錢堪比水花一樣壓到死一死。

　　股價極殘嘅魯大師今個月11號忽然宣布有可能會派特別息,係自2020年末期息以來再一次宣布派息,於是第二日,即係12號股價忽然爆升,全日埋單升足五成。派息加持,之後幾日魯大師都高位企硬,最高去過1.94銀。不過到20號,股價來個跳水急瀉四成七,到第二日,即係21號公司公告,提到原來係大股東誠盛公司喺場內減持,沽咗3434.3萬股,佔公司已發行股份總數12.77巴仙,總共套現4224萬銀港紙。

　　減持之後,魯大師22號再出公告,話「經綜合考慮近期本公司股份價格及成交量出現不尋常波動,為了充分評估有關宣派特別股息的影響,董事會會議取消舉行」,即係唔夠十日之內,就由宣布可能派息又變返唔派。

　　成件事可以話極之弔詭,忽然話派特息爆升,之後大股東場內派貨減持,再一日之後再用「影響太大」來宣布取消開會,變相即係唔派特別息,本來無一物,成個操作就好令人懷疑有,就算唔係有問題都係極之唔尋常。不過事到今日,證監方面都係無表示。

　　有內媒就直接將件事形容係「割韭菜」、「唱高散貨」,記得上年證監高調拉咗一班「微信女」,不過呢類急升急跌嘅戲碼都仲係日日新鮮上映。如果證監定性JPEX係騙案,唔知幾時可以話到畀孖屐聽,上面呢一單係咪涉嫌詐騙?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。