《小傳日記》同胞愛港險!半年來港投保總保費升58倍超級掂!

　　《小傳日記》魚缸今日繼續下沉,終於再跌穿萬八,不過有傳逢跌穿18000就會有基金入市,結果今日午市一開真係又抽返上來,收市前都成功企穩唔通18000真係鐵底?

　　今日跌得最勁都係啲地產股,新地(00016)全年業績按年少賺6%,全日要跌差唔多一成,其餘都要齊齊跌。市道唔好就自然拖到乜都跌,連隻重磅友邦(01299)都要跌兩個

巴仙。不過近期保監局就公布,今年上半年神州旅客來港投保總保費有成319億銀,按年勁升58倍!雖然好大程度上都係低基數效應,不過都比疫情前投保最高峰嘅2016年同期多6個巴仙。而上半年咁大增長主要係來自第二季嘅大爆發,單計第二季有成223億銀,按季大增1.32倍!

　　如果以類別來睇,逐張單計,上半年終身壽險係最多神州客買嘅保單,總共佔五成五,而第二多人買嘅就係危疾,佔三成四。以保費計算,終身壽險就佔總保費嘅八成,有成256.18億銀。

　　依神州法例,同胞要投保香港保險,絕對唔可以喺境內簽單,一定要個人身在香港,先可以投保,所以要買就一定要親身落來先可以簽到單。

　　其實港險對於同胞來講一向都別具吸引力,其中最大原因係好多保險公司係美金單,如果保費以美金計算,咁就唔會受外匯波動影響,保值好多。另外,由最多人投保種類都睇得到,終身

壽險同危疾,好大程度就係填補社保嘅不足,同時都係香港醫療系統比起神州優勝嘅原因,所以上面有錢都想來香港醫病。而的確係香港保險公司保單嘅設計都花樣百出一啲,之前連罕見病都有得保,近期就有某間保險公司出咗末期癌症保單,都可以睇到香港保險嘅獨特、仔細之處,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。